बौदीकाली गाउँपालिका नवलपुरले चौथो संस्करणको माछापुच्छ्रे गाउँपालिका अध्यक्ष कप खेलकुद प्रतियोगिता (गण्डकी प्रदेश अन्तरपालिकास्तरीय पुरुष तथा खुल्ला महिला भलिबल तथा छेलो हान्ने प्रतियोगिता) २०८२ अन्तर्गत पुरुषतर्फको उपाधि हात पारेको छ ।
‘पर्यटन, कृषि, ऊर्जा र गुणस्तरीय पूर्वाधार : सम्मुन्नत माछापुच्छ्रे निर्माणको मूल आधार’ भन्ने नारासहित मछापुच्छ्रे गाउँपालिका खेलकुद विकास समितिको आयोजना एवं वडा नम्बर ४ कार्यालयको व्यवस्थापन सम्पन्न प्रतियोगिताअन्तर्गत शनिबार सम्पन्न पुरुषतर्फको फाइनलमा बौदीकालीले तनहुँको शुक्लागण्डकी नगरपालिकालाई ३–२ को सेटमा पराजित गर्दै उपाधि हात पारेको हो ।
फाइनल खेलको पहिलो सेट बौदीकालीले २५–१७ ले आफ्नो पक्षमा पारे पनि दोस्रो सेट २१–२५ र तेस्रो सेट २२–२५ ले गुमाएको थियो । तीन सेट सकिँदा २–१ ले पछि परेको अवस्थालाई उल्टाउँदै बौदकालीले चौथो सेट २५–१७ ले आफ्नो पक्षमा पार्दै खेललाई २–२ सेटको बराबरी पुर्याएको थियो । खेलको अन्तिम एवं निर्णायक पाँचौँ सेट १५–११ ले आफ्नो पक्षमा पार्दै बौदीकालीले उपाधिसँगै दुई लाख र उपविजेता शुक्लागण्डकीले एक लाख नगदसँगै ट्रफी, मेडल र प्रमाणपत्र पुरस्कार पाए ।
यसअघि शुक्रबार सम्पन्न महिलातर्फको फाइनलमा एलिट भलिबल एकेडेमी, पोखरा– ३, नदीपुरले शान्ता भलिबल ट्रेनिङ सेन्टर भकुन्डे पोखरालाई ३–२ को सेटमा पराजित गर्दै उपाधि हात पारेको थियो । विजेता टोलीलाई आयोजक माछापुच्छ्रे गाउँपालिकाका अध्यक्ष मीनबहादुर गुरुङ, उपाध्यक्ष सीता अधिकारीलगायतले पुरस्कार वितरण गरेका थिए ।
प्रतियोगितामा विधागततर्फ बैदीकालीका हिमाल सुनारी उत्कृष्ट खेलाडी, शुक्लागण्डकीका ईश्वर सुनार स्पाइकर, बौदीकालीका विश्वास अधिकारी ब्लकर, शुक्लागण्डकीका अशोक मल्ल सेटर, बौदीकालीका अशोक श्रेष्ठ सर्भर, शुक्लागण्डकीका मदन ठकुरी डिफेन्डर र बौदकालीका जितबहादुर थापाले उत्कृष्ट प्रशिक्षक घोषित भए ।
यसैगरी महिलातर्फ एलिटकी जेनिशा विक उत्कृष्ट खेलाडी, शान्ताकी साजना नेपाली स्पाइकर, शान्ताकी सलिना गुरुङ ब्लकर, एलिटकी रोशनी गुरुङ सेटर, एलिटकी रिकझना बोटे सर्भर, शान्ताकी पृथ्वी गाहा डिफेन्डर र एलिटका मिलन रोका उत्कृष्ट प्रशिक्षक घोषित भएका थिए । उत्कृष्ट हुने खेलाडी एवं प्रशिक्षकहरूले आयोजक पालिकाको लोगोअंकित खेलकुद पोसाक पुरस्कार पाए ।
छेलो प्रतियोगिताअन्तर्गत अशोक पुन प्रथम हुँदै १०, सरोज मगर दोस्रो हुँदै पाँच, पारसमान गुरुङ तेस्रो हुँदै दुई र सान्तवना स्थान हात पारेका दीपक हर्मेलीले एक हजार नगद पुरस्कार पाएका प्रमुख प्रशासकस्य अधिकृत केशव सुवेदीले जानकारी दिए ।
