अमेरिकाले ऊर्जा आपूर्तिमा सम्भावित अवरोध कम गर्न नयाँ कदम चालेको छ। अमेरिकी ऊर्जा सचिव क्रिस राइटले दक्षिण क्यालिफोर्नियामा रहेको एक तेल कम्पनीलाई पुनः सञ्चालनमा ल्याउन निर्देशन दिएका छन्। यस निर्णयले तेल आपूर्तिको स्थिरता कायम राख्दै राष्ट्रिय ऊर्जा सुरक्षामा टेवा पुर्याउने अपेक्षा गरिएको छ।
निर्देशनअनुसार सान्टा बार्बरा नजिक रहेको सान्टा यनेज तेल इकाई र त्यससँग सम्बन्धित पाइपलाइनहरू पुनः सञ्चालनमा ल्याइनेछ। उक्त परियोजनामा तीनवटा ड्रिलिङ प्लेटफर्म, जल तथा स्थलमार्गीय पाइपलाइन र प्रशोधन सुविधा समावेश छन्।
उक्त इकाई दैनिक करिब ५० हजार ब्यारेल तेल उत्पादन गर्न सक्षम रहेको बताइएको छ। यसबाट मासिक रूपमा करिब १५ लाख ब्यारेल विदेशी कच्चा तेलको आयात प्रतिस्थापन गर्न मद्दत पुग्ने अपेक्षा गरिएको छ।
यसअघि अमेरिकी राष्ट्रपति डोनाल्ड ट्रम्पले आफ्नो दोस्रो कार्यकालको पहिलो दिन पूर्व राष्ट्रपति जो बाइडेनले लागू गरेका तेल उत्खननमा लगाइएको रोकसम्बन्धी आदेशलाई उल्टाएका थिए।
उता क्यालिफोर्नियाका गभर्नर ग्याभिन न्युसमले यस निर्णयप्रति चिन्ता व्यक्त गर्दै तटीय समुदाय, वातावरण र स्थानीय अर्थतन्त्रमा पर्ने सम्भावित असरबारे राज्य सरकार सतर्क रहेको बताएका छन्।
