द्विदिवसीय राष्ट्रिय जय ट्रफी पुरुष इलिट क्रिकेट प्रतियोगिताअन्तर्गत सोमबारदेखि सुरु भएको दोस्रो चरणको एकै दिन कुल २५ विकेट पतन भएका छन् । दोस्रो चरणका खेल कीर्तिपुरस्थित त्रिभुवन अन्तर्राष्ट्रिय मैदान र मूलपानीमा सुरु भएका छन् । त्रिवि मैदानमा नेपाल पुलिस र एपिएफ क्लबबिचको खेलमा कुल १५ विकेट खसेको थियो । यसैगरी, मूलपानी मैदानमा बागमती प्रदेश र त्रिभुवन आर्मीबिचको प्रतिस्पर्धामा १० खेलाडी आउट भए ।
समग्रमा यी दुई खेलमा २५ विकेट खसेका हुन् । पहिलो चरणमा एपिएफ क्लबले सानदार जित निकालेको थियो । पहिलो दिनमा नेपाल एपिएफविरुद्ध नेपाल पुलिस क्लब पहिलो इनिङ्समा ६ रनले पछाडि छ । नेपाल एपिएफले पहिलो ब्याटिङ गरी ६३.४ ओभरमा सबै विकेट गुमाएर १८५ रन जोडेको थियो । पुलिसका लागि ललित राजवंशी र सागर ढकालले सर्वाधिक समान चार विकेट हात पारेका थिए । ललितले ३१.४ ओभरमा ८१ रन खर्चदा नौ मेडन फ्याँकेका थिए । सागरले २६ ओभरमा सात मेडनसहित ६६ रन दिएका थिए ।
पुलिसका लागि थप दुई विकेट कुशल भुर्तेलले हात पारे । एपिएफको फितलो ब्याटिङमा कप्तान रोहितकुमार पौडेलले ४८ बलमा नौ चौका प्रहार गरी ४५ रन जोडेका थिए । सुमित महर्जनले सय बल सामना गरी पाँच चौका र तीन छक्का प्रहार गरी ५५ रनको योगदान दिए । ओपनर दीपक बोहोराले ७३ बलमा २८ रन तथा आसिफ सेखले ३१ बलमा १२ रन बटुले ।
प्रत्युत्तरमा पहिलो इनिङ्स थालेको पुलिसका लागि दिल्साद अलीले ८७ बलमा एक छक्का र सात चौका सहयोगमा ५८ रन जोडे । अमित श्रेष्ठले ५० बलमा तीन छक्का र दुई चौकाको सहयोगमा ४१ रन जोडेका थिए । शंकर राना ४८ रनमा नटआउट रहँदा समान दुई छक्का र चौका प्रहार गरे । एपिएफका लागि पाँच बलरले समान एक विकेट हात पारे । इसाद अहमाद, अभिषेश गौतम, युवराज खत्री, अमार राउटेला र सन्दीप जोराले एक–एक विकेट लिएका हुन् ।
बागमतीविरुद्ध आर्मी ६८ रनले पछाडि
मूलपानी मैदानमा बागमतीले पहिलो ब्याटिङ गरी ७० ओभरमा सात विकेटको क्षतिमा २५९ रनको योगफलमा इनिङ्स समाप्त गरेको थियो । प्रत्युत्तरमा आर्मीले दिनको समाप्तिसम्म तीन विकेटको नोक्सानीमा १९१ रन जोडेको छ । आर्मीले पहिलो दिन ४० ओभर ब्याटिङ गरेको छ । आर्मी बागमतीभन्दा ६८ रनले पछाडि रहेको छ । आर्मीका भीम सार्कीले सर्वाधिक ७४ रनको योगदान दिए ।
भीमले ८३ बलमा ६ चौका र दुई छक्का प्रहार गरे । सन्तोष कार्की ४३ रनमा नटआउट छन् । उनले ७९ बलमा सात चौका ठोकेका छन् । आर्मीका ओपनर तृतराज दासले ४४ बलमा तीन चौका र दुई छक्का प्रहार गर्दै ३८ रन बनाए । बागमतीका लागि रिजन ढकाल, सन्दीप लामिछाने र विपिन आचार्यले समान एक विकेट लिए । सन्दीपले ११ ओभरमा दुई मेडन राखी ५९ रन खर्चेका थिए । यसअघि पहिलो ब्याटिङ गरेको बागमतीले आर्मीविरुद्ध उत्कृष्ट प्रदर्शन गरेको थियो । बागमतीले प्रतिओभर ३.७० को रनरेटमा ब्याटिङ ग¥यो । बागमतीका ओपनर आशुतोष घिरैयाले सर्वाधिक ७७ रन बनाए ।
उनले १२७ बलमा ११ चौका प्रहार गरे । रित गौतम र शुभ कंसाकारले समान २० रन बटुले । ईशान पाण्डेले १०४ बल खेलेर ६९ रन बनाउन पाँच चौका प्रहार गरे । विवेक मगरले तीन छक्का र एक चौका प्रहार गरी ३१ रनको योगदान दिए । आर्मीको बलिङमा सहाब आलमले २२ ओभरमा ६५ रन खर्चेर तीन विकेट हात पारे । नरेन साउदले १२ ओभरमा दुई विकेट लिए ।
