आगामी फागुन २१ गते हुन गइरहेको प्रतिनिधिसभा सदस्य निर्वाचनका लागि छनाेट भएका निर्वाचन प्रहरीको माघ १८ गतेदेखि आधारभूत तालिम सुरु हुने भएको छ ।
निर्वाचन प्रहरीका लागि धनकुटामा दोस्रोपटक म्याद थप गरेपछि मात्रै आवश्यक संख्यामा दरखास्त पुगेको थियो । उनीहरूको आज मात्र छनाेट सम्पन्न भएको छ ।
निर्वाचन प्रहरीको छनाेट सम्पन्न भएपछि बाँकी आवश्यक काम पूरा गरी माघ १८ गतेदेखि २७ गतेसम्म आधारभूत तालिम सञ्चालनको तयारी गरिएको जिल्ला प्रहरी कार्यालय धनकुटाका एसपी शरदकुमार थापा क्षेत्रीले बताए ।
धनकुटाका लागि तोकिएको निर्वाचन प्रहरीको संख्या अपुग भएपछि दुईपटकसम्म आवेदनका लागि म्याद थपिएको थियो । धनकुटामा नेपाल प्रहरीतर्फ ९८९ र सशस्त्र प्रहरीमा ९६ जना गरी एक हजार ८५ जना निर्वाचन प्रहरी भर्ना गरिएको छ । निर्वाचन प्रहरीको आधारभूत तालिम सम्पन्न भएपछि उनीहरूलाई कार्यक्षेत्रमा परिचालन गरिने एसपी थापा क्षेत्रीले बताए ।
धनकुटामा एक लाख १८ हजार ४२५ मतदाता छन्। मतदानका लागि ११९ मतदानस्थल र १६६ मतदान केन्द्र तोकिएको छ । जसमध्ये १६ मतदानस्थल अतिसंवेदनशील, ४९ संवेदनशील र ५४ मतदानस्थललाई सामान्य मानिएको छ । संवेदनशील मतदान केन्द्रमा न्यूनतम तीनजना प्रहरी र १० निर्वाचन प्रहरी परिचालन गर्ने तयारी गरिएको छ ।