रौतहटसहित मधेश प्रदेशका जिल्लामा जाडो बढ्दै गएपछि जनजीवन प्रभावित हुन थालेको छ। बाक्लो हुस्सु र शीतलहरका कारण सर्वसाधारणको दैनिकी कष्टकर बन्दै गएपछि डिभिजन वन कार्यालय रौतहटले सार्वजनिक स्थानमा दाउरा वितरण सुरु गरेको छ।
डिभिजन वन कार्यालय रौतहटका प्रमुख हेमन्तकुमार शाहका अनुसार चन्द्रपुर नगरपालिकाभित्र सर्वसाधारणको बढी आवतजावत हुने स्थान, चोक–चौतारा तथा सार्वजनिक स्थलमा दाउरा वितरण गरिएको हो। चिसोबाट प्रत्यक्ष प्रभावित सर्वसाधारणलाई राहत दिने उद्देश्यले यो पहल गरिएको उनले जानकारी दिए ।
‘जाडोको कारण सर्वसाधारणलाई समस्या भएपछि राहतस्वरूप सार्वजनिक स्थानमा आगो ताप्न सकिने गरी दाउरा उपलब्ध गराइएको हो,’ प्रमुख साहले भने , ‘विशेष गरी बिहान र साँझको समयमा वृद्धवृद्धा, मजदुर तथा सर्वसाधारणलाई यसले सहजता मिल्ने अपेक्षा गरेका छौँ।’ स्थानीयवासीहरूले दाउरा वितरणले चिसोबाट केही राहत मिलेको प्रतिक्रिया दिएका छन्। पछिल्ला दिनहरूमा तापक्रम निरन्तर घट्दै गएपछि मधेशका विभिन्न जिल्लामा जनस्वास्थ्य र दैनिक जनजीवनमा प्रत्यक्ष असर परिरहेको छ।
