भारतीय जनता पार्टी (भाजपा)का नयाँ कार्यकारी अध्यक्षमा नीतिन नवीन चयन भएका छन् । वर्तमान पार्टी प्रमुख जगत प्रकाश नड्डाको स्थानमा सोमबार नवीन नयाँ कार्यकारी अध्यक्षमा चयन भएका हुन् । ४५ वर्षीय नवीन विहारमा भाजपाका तर्फबाट पटक–पटक सांसद र मन्त्री बनिसकेका छन् । हाल उनी विहारका शहरी विकास मन्त्री र पटनाको बाँकीपुरका विधायक हुन् । उनी भाजपाको कार्यकारी अध्यक्षमा नियुक्त भएकोमा बधाई दिँदै प्रधानमन्त्री नरेन्द्र मोदीले नवीनलाई ‘संगठनात्मक अनुभव भएको मिहिनेती युवा नेता र विहारमा धेरै कार्यकालसम्म विधायक र मन्त्रीको रूपमा प्रभावशाली रेकर्ड भएका व्यक्ति’ भनेका छन् ।
‘उनले जनताको आकांक्षा पूरा गर्न लगनशीलताका साथ काम गरेका छन् । उनी आफ्नो विनम्र स्वभाव र आधारभूत काम गर्ने शैलीका लागि परिचित छन् । मलाई विश्वास छ कि उनको ऊर्जा र समर्पणले आगामी समयमा हाम्रो पार्टीलाई बलियो बनाउनेछ । भाजपाको राष्ट्रिय कार्यकारी अध्यक्ष बनेकोमा उनलाई बधाई छ,’ प्रधानमन्त्री मोदीले सामाजिक सञ्जाल एक्समा लेखेका छन् । भाजपाको संविधानमा कार्यकारी अध्यक्ष नियुक्त गर्ने प्रावधान छैन । तर, २०१९ देखि यो पद भाजपा प्रमुखको भूमिका ग्रहण गर्नुअघिको एउटा खुड्किलो बनेको छ । २०१९ मा अमित शाह केन्द्रीय गृहमन्त्री बनेपछि नड्डालाई भाजपा कार्यवाहक अध्यक्ष नियुक्त गरिएको थियो । उनी लगभग ६ महिनासम्म उक्त पदमा रहे र जनवरी २०२० मा औपचारिक रूपमा भाजपा राष्ट्रिय अध्यक्षमा निर्वाचित भए । नड्डाले अहिले लगभग ६ वर्षदेखि पार्टी प्रमुखको रूपमा सेवा गर्दै आएका छन् । भाजपाको संविधानअनुसार एक नेताले तीन वर्षको दुई कार्यकालका लागि अध्यक्षको रूपमा सेवा गर्न सक्छ । भाजपा नेताहरूका अनुसार कार्यकारी अध्यक्षको नियुक्ति एक अन्तरिम व्यवस्था हो ।
स्वर्गीय भाजपा नेता नवीन किशोर सिन्हाका छोरा नीतिन नवीनले पटनाको भाजपा एकाइभित्र बलियो संगठनात्मक आधार निर्माण गर्नुअघि विद्यार्थी राजनीतिमा एबिभिपीमार्फत आफ्नो राजनीतिक करियर सुरु गरेका थिए । उनी २००० को दशकको अन्त्यतिर चुनावी राजनीतिमा प्रवेश गरे र २०१० मा आफ्नो पहिलो विधानसभा चुनाव जिते । उनी भाजपाका सबैभन्दा कान्छा अध्यक्षमध्ये एक हुन् । उनी जनता र संगठनका लागि काम गर्ने धेरै अनुभव बोकेका जुझारु युवा हुन् ।
