रुसी आक्रमणपछि शनिबार बिहान युक्रेनको किभ क्षेत्रका ६ लाखभन्दा बढी मानिस बिजुलीविहीन भएका छन् । शुक्रबार राति रुसले गरेको हमलाका कारण उनीहरू बिजुलीविहीन भएका हुन् । युक्रेनले सहर र अन्य धेरै क्षेत्रमा ऊर्जा पूर्वाधारमा मिसाइल र ड्रोन आक्रमणका कारण बिजुलीको क्षति भएको बताएको छ । रुसले युक्रेनभरि रातारात विभिन्न पूर्वाधार क्षेत्रमा लगभग ३६ वटा मिसाइल र करिब ६०० ड्रोन प्रहार गरेको थियो । आक्रमणमा तीनजनाको मृत्यु र दर्जनौँ घाइते भएका छन् । किभका मेयर भिटाली क्लिट्स्कोका अनुसार घाइते २९ जनामध्ये एक १३ वर्षीय बालक पनि छन् । शान्ति सम्झौता सुरक्षित गर्न अमेरिकाको नेतृत्वमा गरिएको प्रयासका बाबजुद रुसले युक्रेनी नागरिक र ऊर्जा पूर्वाधारमा आक्रमण तीव्र पारेको छ ।
रातभरि गरिएको आक्रमणमा ऊर्जा पूर्वाधारका साथै धेरै आवासीय भवनमा पनि क्षति पुगेको युक्रेनी अधिकारीले बताएका छन् । शनिबार बिहान सबेरै किभभरि ठुलो विस्फोटको आवाज सुनिएको थियो । युक्रेनको वायुसेनाले ५५८ ड्रोन र १९ वटा मिसाइल खसालेको बताएको छ । फेब्रुअरी २०२२ मा रुसले युक्रेनमा पूर्णस्तरीय आक्रमण सुरु गरेदेखि नियमित हवाई बमबारी भोगेका धेरै सहरमध्ये किभ पनि एक हो । रुसले हमला गरिरहँदा युक्रेनले पनि आक्रमण गरेको छ । विशेषगरी, लामो दूरीका हतियार प्रयोग गरेर युक्रेनले तेल रिफाइनरी र डिपोहरूसहित रुसी ऊर्जा पूर्वाधारलाई लक्षित गरेको छ । युक्रेनको सुरक्षा सेवाले कृष्ण सागरमा दुई तेल ट्यांकरलाई आक्रमण गरेको जनाएको छ ।
अमेरिकी राष्ट्रपति डोनाल्ड ट्रम्पले दुवै पक्षलाई शान्ति योजनाको मस्यौदा स्वीकार गर्न दबाब दिइरहेका छन् । युक्रेनी राष्ट्रपति भ्लोदिमिर जेलेन्स्कीले कूटनीतिक प्रयासका स्वागत गर्दै किभको सार्वभौमसत्ता र भविष्यमा हुने कुनै पनि आक्रमणलाई रोक्न सक्ने क्षमता कायम राख्नुपर्ने आवश्यकतामा जोड दिएका छन् । बिहीबार रुसी राष्ट्रपति भ्लादिमिर पुटिनले युद्ध अन्त्य गर्ने आफ्नो मुख्य माग दोहोर्याए । तर, युक्रेनका सेनाहरू मस्कोले दाबी गरेको क्षेत्रबाट फिर्ता भएमा मात्र रुसले आफ्नो आक्रमण रोक्ने उनले चेतावनी दिए ।
