लोसपाका सांसद जितेन्द्र सोनलले मधेश प्रदेशको चौथो मुख्यमन्त्रीको रूपमा पद तथा गोपनीयताको शपथ लिएका छन्।
मुख्यमन्त्री सोनललाई प्रदेश प्रमुख सुमित्रा सुवेदी भण्डारीले पद तथा गोपनीयताका शपथ गराएकी हुन् ।
जसपा नेपालसहित विभिन्न ६ दलको समर्थनमा सोनललाई प्रदेश प्रमुख भण्डारीले बुधबार नै मुख्यमन्त्रीको रूपमा नियुक्त गरेकी थिइन्। मुख्यमन्त्री सोनलले भोजपुरी भाषामा शपथ लिएका थिए ।
मुख्यमन्त्रीको शपथग्रहणपश्चात् दुईजना विनाविभागीय मन्त्रीलाई समेत शपथ गराएका हुन्। शपथ लिनेमा जनमत पार्टीका संसदीय दलका नेता महेशप्रसाद यादव र नेकपा एसका सांसद कनिश पटेल रहेका छन्। मन्त्रीद्वयलाई तत्काल कुनै जिम्मेवारी तोकिएको छैन। यादवले मैथिली र पटेलले भोजपुरी भाषामा शपथ लिएका हुन् ।
जसपा नेपाल, माओवादी केन्द्रले मन्त्रीको मन्त्रीका लागि नामावली नपठाएकाले तत्काल ती पार्टीबाट सरकारमा सहभागिता गराइएको छैन । शपथग्रहण समारोहमा सभामुख रामचन्द्र मण्डल र नेपाली कांग्रेसका प्रतिनिधि सहभागी थिएनन् ।
