४५ मेगावाट क्षमताको माथिल्लो भोटेकोशी कम्पनी आइतबार बेलुकाबाट सञ्चालनमा आएको छ । उत्पादन क्षेत्र भोटेकोशी गाउँपालिका र प्रत्यक्ष प्रभावित स्थानीयलाई १० प्रतिशत सेयर उपलब्ध गराउने सहमति भएपछि एक महिनादेखि बन्द पावरहाउस खुलेको हो ।
जेन–जी आन्दोलनपछि भोटेकोशीका स्थानीयले जेन–जीको नाममा विद्युत्गृहको पावरहाउस बन्द गरेका थिए । पावरहाउस बन्द भएपछि प्रतिकित्ता सेयर एक सय हुने गरी उत्पादन क्षेत्र भोटेकोशी गाउँपालिकाभित्रका प्रभावित स्थानीयलाई १० प्रतिशत सेयर दिन कम्पनी सहमत भएको भोटेकोशी गाउँपालिका प्रमुख पासाङ नुर्पु शेर्पाले जानकारी दिए ।
सिन्धुपाल्चोकका प्रमुख जिल्ला अधिकारी बन्धुप्रसाद बाँस्तोलाको रोहबरमा आइतबार दिउँसो कम्पनीका प्रतिनिधि, गाउँपालिका जनप्रतिनिधि, जेन–जी प्रतिनिधि र स्थानीय अगुवासहितको सर्वपक्षीय बैठकले सेयरबारे सहमति जुटाएको हो । एक महिनादेखि पावरहाउस बन्द हुँदा ३० करोडभन्दा धेरै आम्दानी गुमेको अपर भोटेकोशी पावर कम्पनी लिमिटेडका सहायक महाप्रबन्धक बबिन प्रधानले जानकारी दिए ।
उत्पादन सुरु भएको २५ वर्षपछि कम्पनीले स्थानीयलाई सेयर प्रदान गरेको छ । यसअघि ०७१ पुसमा राजनीतिक दलसँग ६ प्रतिशत सेयर दिने सहमति भएको थियो । यद्यपि, प्राकृतिक विपत्तिको कारणले सेयरको विषय स्थगित भएको थियो । संघर्ष गरेर स्थानीय बासिन्दाले सेयर प्राप्त गर्न सफल भएको जेन–जी प्रतिनिधि फुर्पा शेर्पाले बताए । आयोजनामा सुरुमा ८५ प्रतिशत सेयर लगानी अमेरिकन कम्पनी पान्डा इनर्जीले गरेको थियो । हाल नेपाली व्यवसायी सिद्धार्थशमशेर राणाको तारा म्यानेजमेन्ट कम्पनीले खरिद गरेको छ ।
विद्युत् कम्पनी रहेको स्थान भोटेकोशी वडा नं ३ का वडाध्यक्ष निमासोना शेर्पाले भोटेकोशी पावर कम्पनीले दिने सेयरबाट स्थानीय लाभान्वित हुने बताए । विगतमा भएको सम्झौताअनुसार पाँच वर्षपछि यो जलविद्युत् कम्पनी नेपाल सरकारलाई हस्तान्तरण गर्नुपर्नेछ ।
