विश्वकर्मा पूजाको आर्केस्ट्रामा भएको विवादपछि शान्तिसुरक्षाको माग गर्दै प्रहरी गुहारेका सिराहाको कल्याणपुर नगरपालिका- ८ अरङ गाउँका दलितहरूलाई प्रहरी बोलाउने भन्दै शुक्रबार दिउँसो बस्तीमा लुटपाट र तोडफोड भएको छ।
अरङकाे ठुलो पोखरीको उत्तरपट्टि डिलमा बसोबास गरिरहेका पाँच घर दलितहरूको घर तोडफोड र लुटपाट भएको हो। ‘गाउँमा प्रहरी बोलाउने’ भन्दै दलित बस्तीका पाँचजनाको घर तोडफोड र लुटपाट भएको पीडितहरूले बताए ।
स्थानीय प्रभास सिंह, नितेश सिंह, शैलेन्द्र सिंह, राजकुमार सिंह, मुस्तफा राइनलगायत २०/२५ जनाको समूहले दिउँसो करिब २ बजेतिर घर तोडफोड गर्नुका साथै घरमा रहेका सामान, सुनचाँदी, नगद लुटेर लगेको पीडित सोभित पासमानले बताए । ‘शान्ति सुरक्षाका लागि कल्याणपुरबाट प्रहरी बोलाएका थियौँ, प्रहरीकै अगाडि तोडफोड र लुटपाट भयो,’ उनले भने।
उक्त समूहले घर तोडफोड गर्दै आँगनमा रहेको केरा, कागती, आँपका बिरुवा भाँच्नुका साथै चार आना सुन र ३० तोला चाँदीको गहना लुटेको पीडित अशोक पासमानले बताए ।
त्यस्तै, राजकुमारको घर तोडफोडसहित मजदुरी गरेर राखेको धान-चामलसमेत लुटपाट भएको छ भने दाल चामल, चार आना सुन र १० तोला चाँदीको गहनासहित बाकस फोडेर १८ हजार रुपैयाँ नगदसमेत लुटेर लगेको पीडित रासलाल पासमानले बताए।
उक्त समूहले घर तोडफोड गर्ने क्रममा स्थानीय बिन्दे पासमानको घरमा रहेको २० तोला चाँदीका गहना, दुई आना सुन र तीन हजार नगद लुटेपछि आफ्नो घर तोडफोड गर्दै सबै सामान लुटपाट गरेको पीडित सोभित पासमानले बताए ।
आर्केस्ट्रामा भएको थियो विवाद
१ असोजको विश्वकर्मा पूजाको दिन गाउँमा ल्याइएको आर्केस्ट्रामा हो–हल्ला भएपछि पासमान टोलका युवाहरूसँग प्रभास, नितेसलगायतको विवाद भएको थियो। ‘त्यही वेला उठिबास गराउने धम्की दिएपछि ३ असोजमा इलाका प्रहरी कार्यालय कल्याणपुरमा शान्ति सुरक्षाका लागि निवेदन दिएका थियौँ,’ पीडित सोभितले भने ‘१२ असोजमा प्रहरीमा राखिएको छलफल नभएपछि २१ असोजका लागि तोकिएको थियो ।’
दलित भन्दै हेपेर शुक्रबार बस्तीमा आउँछौँ भन्दै धम्क्याएपछि पीडितहरूले कल्याणपुर प्रहरीलाई बेलैमा खबर गरेको भए पनि त्यहाँबाट गएका प्रहरीकै अगाडि तोडफोड र लुटपाट भएको उनीहरूको गुनासो छ। ‘प्रहरीले एकपल्ट रोक्नेसम्म प्रयास पनि गरेन,’ उनले भने ।
प्रहरीको रेकर्डमा ‘फरार’ भनिएका प्रभास सिंह, चन्द्रदिप सिंह लागयतको समूहले प्रहरीकै अगाडि दलितको घर तोडफोड र लुटपाट गरिरहँदा कल्याणपुरबाट गएका प्रहरीले रोक्नेसम्म प्रयास नगरेको स्थानीय दलितहरुको गुनासो छ । प्रभास ज्यान मार्ने उद्योग र चन्द्रदिप अनुचित लेनदेन मुद्दाका फरार व्यक्ति रहेको बताइएको छ ।
अस्थायी बसोवासको पहल गर्न माग
कल्याणपुरबाट गएको प्रहरीले केही नगरेपछि मिर्चैयाबाट जनपद र सशस्त्र प्रहरी पुगेपछि घर तोडफोड र लुटपाट गर्नेहरु भागेको गाउँलेहरुले बताए ।
मिर्चैयाबाट थप प्रहरी पुगेपछि दलितले बोलाउने बित्तिकै आउने भन्दै प्रहरीलाई अभद्र व्यवहारसहित आक्रमण नै गर्न खोजेका स्थानीय करिब ६१ वर्षीय गणेश कामतीलाई प्रहरीले नियन्त्रणमा लिएको जनाएको छ । दलित बस्तीमा तोडफोड र लुटपाटमा संलग्नहरुको खोजी भइरहेको र ढिलोचाँडो पक्राउ गरी कानुन बमोजिम कारबाही गरिने इलाका प्रहरी कार्यालय मिर्चैयाले जनाएको छ ।
‘भारी वर्षा हुने भनिएको छ, त्यसमा पनि त्यसमा पनि दशैं चल्दैछ’ स्थानीय सामाजिक अभियन्ता सुभेन्द्र साहले भने ‘यस्तो बेलामा दलितहरु ओत लाग्ले घर भत्काउनुका साथै लुटपाट गरेर जघन्य अपराध भएको छ, राज्यका निकायले त्यसमा संलग्न व्यक्तिहरुलाई तत्काल पक्राउ गरी कानुन बमोजिम कारबाही र क्षतिपूर्ति उपलब्ध गराउनु पर्छ ।’ दलितहरु बस्ने घर नभएकाले तत्काल स्थानीय सरकारले अस्थायी बसोवासका लागि पहल गर्नुपर्ने उनको माग छ ।
