कान्ति लोकपथ र हेटौँडा–भैँसे–काठमाडौं रुटमा तीन दिन राति सवारी आवागमनमा रोक

 जिल्ला प्रशासन कार्यालय मकवानपुरले प्राकृतिक विपतको जोखिमलाई मध्यनजर गर्दै कान्ति लोकपथ र हेटौँडा–भैँसे–काठमाडौं सडकखण्डमा तीन दिन रातिको समयमा सवारी आवागमन रोक्ने निर्णय गरेको छ।
प्रशासनले सार्वजनिक गरेको सूचनाअनुसार कान्ति लोकपथमा भोलि शुक्रबार अपराह्न ४ बजेदेखि असोज २० गते बिहान ६ बजेसम्म रातिको समयमा कुनै पनि सवारीसाधन सञ्चालन गर्न नपाइनेछ।
त्यस्तै, हेटौँडा–भैँसे–काठमाडौं सडक खण्डमा भोलि शुक्रबार बेलुकी ५ बजेदेखि २० गते बिहान ६ बजेसम्म सवारीसाधन सञ्चालन नगर्न आग्रह गरिएको छ।
मौसम विज्ञान विभागले असोज १५ गते जारी गरेको पूर्वानुमान सूचनामा आगामी दिनहरूमा भारी वर्षा र पहिरोको जोखिम उच्च रहेको जानकारी दिएपछि प्रशासनले यो कदम चालिएको हो।
जिल्ला प्रशासन कार्यालय मकवानपुरले नदी तटीय क्षेत्रमा बसोबास गर्ने स्थानीयलाई धनजनको क्षति हुन नदिन विशेष सुरक्षा सतर्कता अपनाउन अनुरोध गरेको छ। 
साथै, विपत् व्यवस्थापन र पूर्वतयारीका लागि जिल्लाभरका सबै सुरक्षा निकाय, स्थानीय तह र स्वयंसेवकलाई समन्वयमा रहन पनि निर्देशन दिइएको सूचनामा उल्लेख छ।