नेपाली राष्ट्रिय पुरुष क्रिकेट टोलीले शनिबार टेस्ट राष्ट्र वेस्ट इन्डिजसँग टी–२० आई युनिटी कप क्रिकेट प्रतियोगितामा प्रतिस्पर्धा गर्दै छ । नेपालले पहिलोपटक अन्तर्राष्ट्रिय क्रिकेट काउन्सिल (आइसिसी)को पूर्ण सदस्यविरुद्ध टी–२० आई सिरिज खेल्न लागेको हो । अझ दुईपटक टी–२० विश्वकप तथा दुईपटकको एकदिवसीय विश्वकप च्याम्पियन राष्ट्र वेस्ट इन्डिजसँग पहिलोपटक सिरिज खेल्न लागेको हो । यस अर्थमा यो सिरिज नेपालको नजरमा अहिलेसम्मकै ऐतिहासिक हो ।
यद्यपि, नेपालले विभिन्न अन्तर्राष्ट्रिय क्रिकेट प्रतियोगितामा टेस्ट राष्ट्रसँग प्रतिस्पर्धा नगरेको होइन । तर, टेस्ट राष्ट्रविरुद्ध टी–२० सिरिज खेल्न लागेको पहिलोपटक नै हो । युएईको सारजहाँ क्रिकेट मैदानमा नेपाली क्रिकेटरले बिहीबारदेखि तयारी सुरु गरेका छन् । सारजहाँमा साँझ सबै खेलाडीले प्रशिक्षण गरेको नेपाल क्रिकेट संघ (क्यान)ले जनाएको छ । नेपाली टोलीसँग मुख्य प्रशिक्षक स्टुवार्ट ल पनि जोडिएका छन् । खेलाडी युएई प्रस्थान गर्दा सहायक प्रशिक्षकको भूमिमा निर्वाह गरेका तथा पूर्वकप्तान ज्ञानेन्द्र मल्ल मात्र थिए ।
स्टुवार्ट अस्ट्रेलियाबाट सिधै युएईमा नेपाली टोलीसँग जोडिएका हुन् । उनको आगमनसँगै खेलाडीमा एक किसिमको उत्साह थपिएको छ । नेपालले यस सिरिजलाई ओमानमा हुने आइसिसी टी–२० विश्वकपअन्तर्गत एसियन क्षेत्रीय छनोटको अन्तिम तयारीका रूपमा लिएको छ । सिरिजको समाप्तिसँगै नेपाली टोली ओमानमा विश्वकप छनोट खेलमा सहभागी हुनेछ । छनोट खेलअघि आफूलाई आत्मविश्वास बढाउन वेस्ट इन्डिजसँगको खेल महत्वपूर्ण हुने कप्तान रोहितकुमार पौडेल बताउँछन् । ‘हामीले ऐतिहासिक सिरिजका लागि राम्रो तयारी गरेका छौँ,’ पौडेलले बिदाइ कार्यक्रममा भनेका थिए, ‘सबै खेलाडी सिरिज खेल्न उत्साहित छौँ ।’
विश्वकपको तयारीमा रहेको नेपालले अस्ट्रेलियामा विभिन्न क्लबसँग खेलेको थियो । अस्ट्रेलियामा बंगलादेश तथा पाकिस्तानको ‘ए’ टोलीसँग पनि नेपालले प्रतिस्पर्धा गर्यो । दुई साताको अस्ट्रेलिया भ्रमणले पनि नेपालको विश्वकप छनोटको तयारी राम्रो भएको कप्तान पौडेलको भनाइ रह्यो । ‘तयारी एकदम राम्रो रह्यो । विश्वकप छनोटअघि अस्ट्रेलियामा पनि राम्रो खेल खेल्यौँ,’ उनले भने, ‘यसले पनि वेस्ट इन्डिजविरुद्धको खेल र विश्वकप छनोटमा राम्रो नतिजा निकाल्नेमा आशावादी छौँ ।’
क्यानले गत बुधबार गरेको बिदाइमा कप्तान पौडेलले वेस्ट इन्डिजसँग खेल्न सबैमा आत्मविश्वास भएको उल्लेख गरेका थिए । ‘हामी एकदम आत्मविश्वासी छौँ । विभिन्न प्रतियोगिताका अनुभवसँगै मोटिभेसन प्राप्त गरेका छौँ । यसकारण वेस्ट इन्डिजलाई निराश बनाउँछौँ,’ उनले भने ।
विश्वकप छनोटअघि अन्तिम तयारी
लगातार दोस्रो र समग्रमा तेस्रोपटक टी–२० विश्वकप खेल्ने योजना बनाएको नेपालले यो सिरिजलाई अन्तिम तयारीका रूपमा लिएको छ । नेपालले सन् २०१४ मा पारस खड्काको कप्तानीमा पहिलोपटक बंगलादेशमा टी–२० विश्वकप खेलेको थियो ।
डेब्यु विश्वकपमै नेपालले सनसनी नतिजा निकाली बलिया राष्ट्र हङकङ र अफगानिस्तानमाथि जित निकालेको थियो । गत वर्ष नेपालले अमेरिका र वेस्ट इन्डिजले संयुक्त रूपमा आयोजना गरेको विश्वकपमा उत्कृष्ट प्रदर्शन गरेको थियो । नेपालले दक्षिण अफ्रिका र बंगलादेशविरुद्ध सनसनी प्रदर्शन गरेको थियो । दक्षिण अफ्रिकासँग नेपाल १ रनले चुकेको थियो । ‘वेस्ट इन्डिजसँग राम्रो खेल्ने योजना छ । खेलाडीले पनि सिरिजमा आफ्नो लय कायम राख्ने विश्वास छ,’ पौडेलले भने, ‘हामी विश्वकपमा छनोट हुन्छौँ ।’
यसअघि नेपालले गत अप्रिलमा हङकङमा भएको चारदेशीय टी–२० सिरिज खेलेको थियो । त्यसपछि नेपालले स्कटल्यान्डमा नेदरल्यान्ड्स सम्मलित टी–२० आई खेलेको थियो । गत भदौमा नेपालले अस्ट्रेलियामा टप एन्ड टी–२० सिरिज खेल्यो । ‘नेपालले यसपटक विश्वकपको तयारी राम्रो गरेको छ । युरोपदेखि अस्ट्रेलियाली पिचमा खेल्यौँ र अभ्यास गर्यौँ,’ पौडेलले भने ।
तीन खेलाडी परिवर्तन
क्यानले वेस्ट इन्डिजसँगको सिरिजका लागि तीन खेलाडी परिवर्तन गरेको छ । सन्दीप जोरा, ललितनारायण राजवंशी र मोहमद आदिल अन्सारीले स्थान बनाएका छन् । यसअघि अस्ट्रेलिया भ्रमणमा स्थान बनाएका भीम सार्की, रिजन ढकाल र रूपेश सिंहले टोलीमा स्थान रक्षा गर्न सकेनन् । यसपटक टोली सन्तुलित बनाउन ब्याट्सम्यान, बलर र अलराउन्डर समावेश भएका छन् ।
राम्रो तयारी गरेका छौँ
रोहितकुमार पौडेल, कप्तान, नेपाल
ऐतिहासिक सिरिजका लागि राम्रो तयारी गरेका छौँ । सबै खेलाडी सिरिज खेल्न उत्साहित छौँ । वेस्ट इन्डिजलाई हराउने लक्ष्य पनि छ । खेलाडीहरूमा पनि सिरिजमा आफ्नो लय कायम राख्ने विश्वास छ । नेपालले यसपटक विश्वकपको तयारी राम्रो गरेको छ । युरोपदेखि अस्ट्रेलियाली पिचमा खेल्यौँ र अभ्यास गर्यौँ ।
ऐतिहासिक अवसर हो
ज्ञानेन्द्र मल्ल, सहायक प्रशिक्षक, नेपाल
हामी ऐतिहासिक सिरिज खेल्दै छौँ । हाम्रा लागि राम्रो अवसर पनि छ । विश्वकप छनोटअगाडि अर्को तयारीको मौका जुरेको छ । एउटा टेस्ट राष्ट्रलाई हराउने मौका पनि छ । युएईमा राम्रो तयारी गरे विश्वकपमा पनि छनोट हुन सक्छौँ भन्ने विश्वास छ । खेलाडीहरू लामो समयदेखि प्रशिक्षणमा छन् । उनीहरूले लगातार अन्तर्राष्ट्रिय एक्स्पोजर पाइरहेका छन् ।
