नेकपा एमालेका सचिव योगेश भट्टराईले पार्टी पुनर्गठन गर्न अपिल गरेका छन्। बिहीबार सामाजिक सञ्जाल फेसबुकमार्फत भिडियो सन्देश जारी गर्दै भट्टराईले पार्टी पुनर्गठनको विषय उठाएका हुन्।
नयाँ पुस्ताको भावना र माग सम्बोधन गर्न अहिलेकै राजनीतिक नेतृत्व, संरचना र मनोविज्ञानबाट सम्भव नरहेको उल्लेख गर्दै उनले लेखेका छन्, ‘२३ भदौले दिएको सन्देश ग्रहण गर्नु र त्यसमा अभिव्यक्त भावनाको वस्तुगत सम्मान गर्दै राज्य, समाज र पार्टी संरचनामा बहुआयमिक रुपान्तरण गर्नु अनिवार्य र पहिलो सर्त हो।’
विगतमा भएका पार्टी पुनर्गठनका दृष्टान्त पेस गर्दै भट्टराईले पुनर्गठन र रूपान्तरणको बहसलाई वर्तमान मूल नेतृत्वप्रतिको प्रहारको रूपमा जबर्जस्ती उत्तेजनापूर्ण व्याख्या गर्न नहुने प्रस्ट पारेका छन्।
भट्टराईले भनेका छन्, ‘...पार्टी र आन्दोलनको पुनर्गठन गरिरहँदा हामीले इतिहासको बेवास्ता र अपमान कदापी गर्नुहुन्न। पार्टीका नेताहरू जो आज नेतृत्वमा हुनुहुन्छ, लामो समय तपाईं–हामी पनि उहाँहरूसँगै थियौं। यो जस–अपजसको भागीदार हामी पनि हौँ। त्यसैले म यो वेला भन्छु– उहाँहरूको सम्मानसहित पुनर्गठन।’
