तीन वर्षअघि पोखरा रंगशालास्थित फुटबल मैदानमा दर्शकले व्यवस्थित रूपमा खेल हेर्न फ्लोरप्लेट राखिएको थियो । तर, अहिले यो प्रयोग गर्न नमिल्ने अवस्थामा पुगेको छ । ०७९, २८ असोजमा एमएम कन्ट्रक्सन जावलाखेल ललितपुर (जेभी) र भारतीय कम्पनी ग्रेट स्पोर्टस्ले फ्लोरप्लेट सिट जडान गरेका थिए । दुई कम्पनीले जडान गरेको फ्लोरप्लेट सिटमा दर्शक बस्न नमिल्ने भएपछि त्यसलाई परिवर्तन गर्न सुरु गरिएको छ । पुरानो सिट फ्रान्सका कम्पनीको थियो । अहिले राखिएका स्टिलको सिट चितवनस्थित जलप नेपालमा तयार गरिएको हो ।
कम्पनीले एक लाख चार सय तीन वर्गफिट सिटमा नयाँ सिट राख्ने काम धमाधम गरिरहेको छ । यो फुटबल रंगशाला २६ फागुन ०७५ मा शिलान्यास भएको थियो । निर्माण कम्पनीले ०७९ मा राष्ट्रिय खेलकुद परिषद्लाई हस्तान्तरण गरेको थियो । १८ हजार पाँच सय सिट क्षमताको प्यारापिटसहितको रंगशाला एक अर्ब २४ करोड ३५ लाख ४४ हजार ४८० रुपैयाँमा निर्माण सम्पन्न भएको हो । निर्माण कम्पनी एमए कन्ट्रक्सनका प्रतिनिधि दीपक बरालले वारेन्टीको म्याद सकिए पनि फ्लोरसिट विदेशी कम्पनी जोडिएकाले आफ्नो साख बचाउन सिट परिवर्तन गरिरहेको बताए ।
‘यी सबै विदेशमै जडान भएर पोखरामा ल्याइएको थियो । यसको वारेन्टी सकिएको छ, तर हामी आफ्नो इज्जत जोगाउन फेरि नयाँ राख्दै छौँ,’ बरालले भने । पूरै सिट परिवर्तन गर्न पाँच करोड खर्च हुने र खर्च निर्माण कम्पनीले व्यहोर्ने उनले बताए ।
सन् २०१९ मा भएको १३औँ दक्षिण एसियाली खेलकुद प्रतियोगिता (साग)अन्तर्गत यसै पोखरा रंगशालामा विभिन्न खेल भएका थिए । तत्कालीन राष्ट्रिय खेलकुद परिषद्का सदस्यसचिव केशवकुमार विष्टले पोखरा रंगशाला १८ हजार पाँच सय सिट क्षमताको प्यारापिटसहितको बनाउन निर्देशन दिएका थिए ।
विश्व फुटबल महासंघ फिफाको मापदण्डअनुरूप फुटबल मैदान एक सय पाँच मिटर लम्बाइ र ६८ मिटरको चौडाइको छ । साथै, एथलेटिक्सको चार सय मिटरको आठ लेनको सिन्थेटिक ट्रयाक पनि छ ।
जडानको एक वर्षपछि कुहिने समस्या
ठेक्का पाएको कम्पनीले रंगशालामा जडान भएको फ्लोरसिट ५० वर्षका लागि भनी निर्माण गरेको थियो । सुरुमा फ्लोरसिट राम्रो र आकर्षक देखिएको थियो । तर, जडान भएको अर्को वर्षदेखि नै कुहिने समस्या आएको जिल्ला खेलकुद विकास समितिका अध्यक्ष मिलन गुरुङले बताए । ‘हामीले प्रयोग गर्न नमिल्ने अवस्था देखेपछि फेर्न सुरु गरिएका हौँ,’ गुरुङले भने, ‘फ्लोरप्लेट सिट सुरुमा रामै्र थियो, तर पछि मक्किन र कुहिन थाल्यो ।’
पोखराको मौसमअनुसार यस किसिमको फ्लोरसिट उपयुक्त नहुने उनको भनाइ छ । ‘निर्माण कम्पनीले जुन सिट प्रयोग गर्यो । पोखराजस्तो घामपानी पर्ने स्थानमा उपयुक्त देखिएन,’ गुरुङले भने, ‘यसैकारण कुहिएको जस्तो लाग्छ ।’ जडान भएको सिटले घामपानी सहन नसक्ने प्रकृति नभएको बताए ।
‘यसैकारण कारण लेउ लाग्ने, मक्किने, कुहिएर फुट्ने समस्या आएको हो । धेरै प्रयासका बाबजुद स्टिलको सिट राख्ने काम निर्माण कम्पनीले नै सुरु गरेको हो,’ सिट काम नलाग्नु कारणबारे गुरुङले भने, ‘निर्माण कम्पनीसँगको सम्झौताअनुसार १२ वर्षसम्म उनीहरूले मर्मत गर्नेछन् । सोहीअनुसार कम्पनीले सिट फेर्ने कार्य भइरहेको छ ।’
फ्रान्सबाट झिकाइएको फ्लोरसिट
फुटबल रंगशालामा राखिएका सिट फ्रान्सबाट ल्याइएको हो जुन युरोपेली राष्ट्रमा यो निकै बलियो र आकर्षक मानिन्छ । ‘हामीले गुणस्तरीय हेरी फ्रान्सबाट फ्लोरसिट झिकायौँ । युरोपमा यस्ता सिट निकै प्रयोग हुने गर्छ,’ एमए कन्ट्रक्सनका बरालले भने, ‘पोखराजस्तो धेरै पानी पर्ने र गर्मी हुने स्थानका लागि यो उपयुक्त नहुने रहेछ । जसका कारण केही वर्षमै प्रयोग गर्न नमिल्ने अवस्थामा पुग्यो ।’ सिटमा धेरै समस्या देखिएपछि सिट राखेको फ्रान्सको कम्पनीका इन्जिनियर आएर स्थलगत अवलोकन गरेका थिए । उनीहरूले नै निर्माणको क्रममा पोखरा आएर कामसमेत गरेका थिए ।
