नेपाल नागरिक उड्डयन प्राधिकरणले नयाँ स्थानमा जग्गा उपलब्ध गराउन आलटाल गर्दा सिनामंगलस्थित हवाई इन्धन डिपो स्थानान्तरण गर्न ढिलाइ भएको आयल निगमले जनाएको छ । आधुनिक प्रविधियुक्त नयाँ डिपोको विस्तृत परियोजना प्रतिवेदन (डिपिआर) तयार भइसक्दासमेत प्राधिकरणले जग्गा उपलब्ध नगराउँदा निर्माण कार्य अघि बढाउन ढिलाइ भएको निगमले दाबी गरेको हो ।
नयाँ गुरुयोजना बनाएर त्रिभुवन विमानस्थल विस्तार गरिरहेको प्राधिकरणले हाल निगमको हवाई इन्धन डिपो रहेको स्थानमा ‘ट्याक्सी वे’ बनाउने र इन्धन डिपोका लागि विमानस्थलको उत्तर–पश्चिम कुना गुह्येश्वरीमा जग्गा उपलब्ध गराउने नीति लिएको छ । मन्त्रिपरिषद्ले गत २८ भदौमा सिनामंगलस्थित हवाई इन्धन डिपो गुह्येश्वरीमा स्थानान्तरण गर्न स्वीकृति दिइसकेको छ । तर, नौ महिना बितिसक्दासमेत उक्त स्थानको जग्गा उपलब्ध गराउन प्राधिकरणका तर्फबाट ठोस प्रगति नभएको निगमका उपनिर्देशक प्रदीप यादवले बताए ।
निगमले आइतबार पत्रकार सम्मेलन गरेर डिपो स्थानान्तरणमा भइरहेको ढिलाइबारे जानकारी गराएको हो । मन्त्रिपरिषद्ले स्वीकृति दिएयता प्राधिकरणले जग्गा खाली गर्नका लागि माटोको ढिस्को कटान गर्नेबाहेक अन्य केही काम नगरेको उपनिर्देशक यादवले जानकारी दिए । ‘मन्त्रिपरिषद्ले नयाँ डिपो निर्माण गर्न स्वीकृति दिएपछि हामीले विस्तृत परियोजना प्रतिवेदन (डिपिआर) बनाउन गत ५ मंसिरमा इन्जिनियरिङ अध्ययन संस्थान, पुल्चोकको कन्सल्टेन्सी सेवा विभागसँग सम्झौता गरिसकेका छौँ,’ यादवले भने, ‘आगामी २७ असारमा डिपिआर हस्तान्तरणसमेत हुँदै छ ।’
