चालू आर्थिक वर्ष ०८१÷८२ को पहिलो आठ महिनामा ११ खर्ब ४५ अर्बको वस्तु आयात भएको छ । यो गत आर्थिक वर्षको आठ महिनाको तुलनामा ११.२ प्रतिशतले बढी हो । गत आवको सोही अवधिमा १० खर्ब ३० अर्बको आयात भएको थियो ।
त्यस्तै, चालू आवको आठ महिनामा एक खर्ब ५८ अर्बको वस्तु निर्यात भएको छ । यो गत आवको सोही अवधिको तुलनामा ५७.२ प्रतिशतले बढी हो । गत आवको सोही अवधिमा एक खर्ब मात्रै निर्यात भएको थियो । समीक्षा अवधिमा व्यापारघाटा ६.२२ प्रतिशतले बढेको छ । गत आवको आठ महिनामा नौ खर्ब २९ अर्बको व्यापारघाटा पुगेकामा चालू आवको सोही अवधिमा नौ खर्ब ८७ अर्बको वस्तु निर्यात भएको छ । कुल वैदेशिक व्यापार १५.२९ प्रतिशतले बढेर १३ खर्ब तीन अर्ब पुगेको छ । सर्वाधिक आयात भारतबाट ६ खर्ब ८८ अर्बबराबरको भएको छ । भारततर्फ निर्यात भने एक खर्ब २५ अर्ब छ । यो अवधिमा भारतसँगको व्यापारघाटा पाँच खर्ब ६३ अर्ब छ । त्यस्तै, चीनबाट दुई खर्ब १९ अर्बको वस्तु आयात भएको छ भने वस्तु निर्यात दुई अर्ब १२ करोडको निर्यात भएको छ । चीनसँग नेपालले दुई खर्ब १७ अर्बको व्यापारघाटा व्यहोर्नुपरेको छ ।
सर्वाधिक आयात हुनेमा डिजेल, कच्चा भटमासको तेल, पेट्रोल, खाना पकाउने ग्यास छन् । बढी निर्यात हुनेमा भटमासको प्रशोधित तेल, सूर्यमुखी तेल, गलैँचा र अलैँची छन् ।
