पर्यटन प्रवर्द्धनमा कैलाश गाउँपालिका

मकवानपुरको कैलाश गाउँपालिकाले आफ्नै लगानीमा जिपलाइन निर्माण गरेपछि यहाँ घुम्न आउने पर्यटकले जिपलाइनको मज्जा लिन पाउने भएका छन् । गाउँपालिकाले यहाँका दुई प्रमुख धार्मिक एवं पर्यटकीय स्थल कैलाश र वैकुण्ठलाई जोड्ने गरी जिपलाइन निर्माण गरेको हो । 

जिपलाइन निर्माणपछि यहाँ घुम्न आउने पर्यटकले दुई फरक स्थानमा रहेका धार्मिक तथा पर्यटकीय स्थल घुम्न सहजता हुनुका साथै सहासिक पर्यटनको मज्जा लिन सक्ने भएका छन् । साहसिक पर्यटन गर्न रुचाउने पर्यटकका लागि जिपलाइनले थप आकर्षित गर्ने गाउँपालिकाका अध्यक्ष लोकबहादुर मोक्तानको विश्वास छ ।

गाउँपालिकाले जिपलाइनको शनिबार पहिलो चरणको परीक्षणसमेत गरेको छ । पालिकास्तरबाटै निर्माण भएको पहिलो जिपलाइनको प्राविधिक टोलीसहित गाउँपालिकाका अध्यक्ष लोकबहादुर मोक्तान, वडा नम्बर २ का वडा अध्यक्ष राजेन्द्र घिसिङ, योजना शाखा प्रमुख नरेन्द्रदत्त भट्ट, इन्जिनियर अनिल जोशीलगायतको टोलीले परीक्षण गरेको हो । पहिलो चरणमा ब्रेकिङ सिस्टम (सोलोप)सम्बन्धी कार्यको परीक्षण गरिएको जिपलाइन प्राविधिक एवं प्रशिक्षक बद्री घिमिरेले जानकारी दिए । उनका अनुसार दोस्रो चरणको परीक्षणपछि जिपलाइन सञ्चालनमा ल्याउन सकिनेछ ।

गाउँपालिका अध्यक्ष मोक्तानले एक हजार दुई सय मिटर लामो जिपलाइनको निर्माण कार्य सन्ध्या निर्माण सेवाले गरेको जानकारी दिए । 

उनका अनुसार जिपलाइन ८८ लाख ५६ हजार सात सय ६१ रुपैयाँमा निर्माण गरिएको हो । निर्माणस्थल भौगोलिक रूपमा विकट भए पनि निर्माण कम्पनीले तोकिएको समय ०८१ फागुन मसान्तभित्रै जिपलाइन निर्माणको काम सम्पन्न गरेको उनको भनाइ छ ।

पालिकाको बहुवर्षीय योजनाअन्तर्गत निर्माण सम्पन्न भएको जिपलाइनको दुई स्थानमा स्टेसन, ब्रेकिङ सिस्टम (हारनेस) र तार निर्माण गरिएको अध्यक्ष मोक्तानले जानकारी दिए । उनले जिपलाइन निर्माण सम्पन्न भए पनि अन्य भौतिक निर्माणको काम बाँकी रहेकाले जिपलाइनको पूर्ण सञ्चालनका लागि भने केही समय लाग्ने बताए । 

जिपलाइन सञ्चालनपछि छिमेकी जिल्ला धादिङको रोराङ, बेनीघाट र गजुरी गाउँपालिका, मकवानपुरको हेटौँडा, थाहानगर, राक्सिराङ र मनहरी गाउँपालिकालगायतका स्थानबाट पर्यटक आउने विश्वास लिइएको वडा नम्बर २ का वडा अध्यक्ष राजेन्द्र घिसिङले बताए । उनले धादिङसँग सिमाना जोडिएकाले बेनीघाट, थाहानगर र मनहरी बजारलगायतका क्षेत्रबाट जिपलाइन स्थलसम्म पुग्न करिब ३३ किलोमिटरको यात्रा गर्नुपर्ने जानकारी दिए । जिपलाइनसँगै वैकुण्ठमा घुम्न धार्मिकस्थलसँगै पर्यटकीय पार्कसमेत निर्माण भइसकेको अध्यक्ष घिसिङले बताए ।