सिवाइसी अत्तरियाले अर्जुन ट्रफी राष्ट्रिय टी–२० च्याम्पियनसिपको उपाधि जितेको छ । धनगढीको फाप्ला रंगशालामा सोमबार भएको फाइनलमा अत्तरियाले फ्रेन्ड्स युथ क्लब डडेलधुरालाई ३४ रनले हराउँदै उपाधि हात पारेको हो । पहिलो ब्याटिङ गरेको अत्तरियाले २० ओभरमा ११९ रनको योगफल खडा गरेको थियो । प्रत्युत्तरमा डडेलधुराले १८ ओभरमा सबै विकेट गुमाएर ८४ रन मात्र बनाएको थियो । मध्यम लक्ष्य रक्षा गर्ने क्रममा अत्तरियाका साहब आलमले घातक बलिङ गरेका थिए ।
आलमले आठ रन खर्चेर तीन विकेट हात पारे । प्रतियोगितामा राष्ट्रिय टोलीका ओपनर कुशल भुर्तेल उत्कृष्ट ब्याट्सम्यान र बलर घोषित भए । यसैगरी, म्यान अफ दी सिरिज विवेक यादव र उदीयमान खेलाडी हिकमत महरा भएका छन् । म्यान अफ दी सिरिज भएका विवेकले प्रतियोगितामा १५२ रन बनाउनुका साथै १० विकेट हात पारेका थिए ।
उपाधि भिडन्तमा मध्यम योगफल
यसअघि स्तरीय ब्याटिङ गरेको अत्तरियाले फाइनलमा डडेलधुराविरुद्ध कमजोर प्रदर्शन ग¥यो । इनिङ्सका दोस्रो बलमै ओपनरलाई गुमाएको अत्तरियाका लागि रासिद खानले सर्वाधिक ३१ रनको योगदान दिए । उनले २१ बलमा एक चौका र तीन छक्का प्रहार गरे । कप्तान सन्तोष कार्कीले २३ बलमा तीन चौकाको सहयोगमा २० रन जोडे । शंकर रानाले २१ बलमा दुई चौका र एक छक्का प्रहार गरी २० रन बनाए । सन्तोष र शंकरबिच दोस्रो विकेटका लागि ४० रनको साझेदारी भएको थियो ।
मध्यक्रममा दीपेश कँडेल र भीम सार्कीले सोचेजस्तो योगदान दिन सकेनन् । भीमले ११ बलमा १० रन तथा दीपेशले नौ बलमा सात रन बनाए । त्यसपछि विवेक र रासिदबिच गतिलो साझेदारी भएको थियो । यसबाहेक अन्य ब्याट्सम्यानले दोहोरो रनमा अंक बनाउन सकेनन् । बलिङमा अभिषेक गौतमले कसिलो बलिङ गर्दै १५ रनमा चार विकेट लिए । गौतमले महत्वपूर्ण विकेट लिएका कारण नै अत्तिरियाले डडेलधुरालाई मध्यम योगफल दिएको हो । कुशल भुर्तेलले ३४ रनमा एक तथा अजय चौहानले १३ रनमा एक विकेट हात पारे ।
दिपेश र आलमले लिए समान तीन विकेट
अत्तरियाका लागि दुई बलरले उत्कृष्ट बलिङ गरेका थिए । ओपनर बलरद्वय दिपेश कँडेल र साहब आलमले समान तीन विकेट हात पारे । दिपेशले १४ रन तथा साहबले आठ रन दिए । सहावले एक मेडन राखे । यसैगरी कलम गुप्ताले २२ रनमा दुई विकेट हात पारे । विवेकले १२ रनमा दुई विकेट लिए । डडेलधुराको ब्याटिङमा ओपनर भुर्तेलले २२ बलमा दुई चौकाको सहयोगमा २० रन बनाए । गजेन्द्र बोहराले २८ बलमा २४ रन जोडे । कप्तान सन्दीप जोराले पाँच तथा अशोक धामीले ११ रन बनाए ।
