किताबखानाको तीन लाख घुसकाण्डमा थप दुई पक्राउ

राष्ट्रिय किताबखाना (शिक्षक) छाउनीमा कार्यरत शाखा अधिकृत धनेश्वर प्रसाईंले पेन्सनपट्टा बनाइदिन तीन लाख घुस लिएको प्रकरणमा थप दुईजना पक्राउ परेका छन् । कार्यालय सहयोगी भवानी अधिकारी र बिचौलिया सुदर्शन न्यौपानेसमेतलाई पक्राउ गरी अख्तियार दुरुपयोग अनुसन्धान आयोगले आइतबार विशेष अदालतमा मुद्दा दायर गरेको छ ।   

अवकाशप्राप्त शिक्षकको नियमअनुसार पेन्सनपट्टा (निवृत्तभरण अधिकारपत्र) बनाउनका लागि रोकेर कर्मचारीले घुस डिल गरेका थिए । बिचौलियाबाट कार्यालय सहयोगी हुँदै सो घुस रकम अधिकृतसम्म पुगेको थियो । तीनैजनाविरुद्ध तीन लाख बिगो कायम गरी मुद्दा दायर गरिएको आयोगले जनाएको छ ।