मुलुकले आफ्नो सबैभन्दा खराब आर्थिक मन्दीबाट बाहिर निस्कने थप संकेतहरू देखाएपछि श्रीलंकाले मंगलबार सवारीसाधन आयातमा लगाइएको पाँच वर्षको प्रतिबन्ध हटाउने घोषणा गरेको छ ।
सूचनामन्त्री नलिन्दा जयतिसाले सन् २०२० देखि लागु गरिएको प्रतिबन्ध चरणबद्ध रूपमा हटाएर शनिबारदेखि बस, ट्रक र उपयोगिता सवारी साधनहरूको आयात खुला गरिने बताए ।
‘हाम्रो विदेशी मुद्रा सञ्चिति रित्तिने गरी आयातमा वृद्धि हुन नदिन हामी धेरै सावधानीपूर्वक अघि बढिरहेका छौँ,’ जयतिसाले कोलम्बोमा पत्रकारहरूलाई भने, ‘मागका आधारमा हामी कार, मोटरसाइकल र तीनपांग्रे सवारीसाधनजस्ता अन्य श्रेणीका सवारी साधनहरूको आयात खोल्नेछौँ ।’
उनले आयात आवश्यक कर राजस्व उत्पन्न गर्न आवश्यक भएको बताए । सरकारले यस वर्ष आयातलाई लगभग एक अर्ब २० करोड डलरमा सीमित गर्ने आशा गरेको छ । सवारी साधनमा हालको कर दर तीन सय प्रतिशतभन्दा बढी छ ।
श्रीलंकाले सन् २०२० मार्चमा आयात प्रतिबन्ध लगाउनु अघिको अन्तिम पूर्ण वर्ष सन् २०१९ मा सवारीसाधन आयातमा एक अर्ब ४० करोड डलर खर्च गरेको थियो ।
