तनहुँ पूर्वाधार कार्यालयद्वारा विभिन्न योजनाको बोलपत्र आह्वान

पूर्वाधार विकास कार्यालय तनहुँले चालू आर्थिक वर्षमा सञ्चालन गर्ने विभिन्न ४० योजनाको बोलपत्र आह्वानको सूचना प्रकाशित गरेको छ ।

कार्यालय प्रमुख रवीन्द्र तिवारीले कतिपय योजना सम्झौता भइसकेको र कतिपय योजना सम्झौता चरणमा रहेको जानकारी दिए। उनका अनुसार बाँकी केही योजनाको बोलपत्र आह्वानको सूचना प्रकाशनको चरणमा रहेका छन् ।

उनले भने, ‘पाँच करोडभन्दा साना दुईवटा साना बहुवर्षीय योजनाको ठेक्का सम्झौता गरिएको छ । यस आर्थिक वर्षमा हालसम्म उपभोक्ता समितिबाट निर्माण कार्य गर्ने गरी कुनै पनि योजना सम्झौता गरिएको छैन ।’

तिवारीका अनुसार चालू आर्थिक वर्षका लागि एक अर्ब ४२ करोड १२ लाख आठ हजार विनियोजन भएकोमा  २० करोड ४० लाख ९१ हजार ३१० खर्च भएको छ । चालूतर्फ एक करोड ९१ लाख २८ हजार विनियोजन भएकोमा २२.८५ प्रतिशत प्रगति भएको छ । पुँजीगततर्फ प्रदेशबाट एक अर्ब ४० करोड १२ लाख ८० हजार विनियोजन भएकामा १४.२४ प्रतिशत प्रगति भएको छ । जिल्लामा निर्माणाधीन नौ सडकपुल छन् । त्यसमध्ये चारवटा पुराना र पाँचवटा नयाँ रहेको तिवारीले बताए।

उनले भने, ‘जिल्लामा डिपिआर तयार भएका अन्य बाँकी सडकपुल संख्या २३ वटा छ । चार सडकपुल मौलाकाली जलविद्युत् आयोजनाको डुबान क्षेत्रमा पर्ने जानकारी आएको छ । अन्य बाँकी १९ वटा सडकपुल कार्यान्वयनमा लैजान सक्ने अवस्था छ ।’

चालू आर्थिक वर्षमा रानीटारी हर्कपुर घुम्ती किल्चोक मानुङ छाङदेखि भीमाद सडकका लागि १८ करोड, दमौली बिसघरे झापुटार (सेती नदी सडक पुल)का लागि पाँच करोड, खुदीखोला कटुसे रह पक्की पुल बन्दीपुरका लागि तीन करोड, ढोरबाराही मार्ग (साँखे थुम्कीडाँडा खण्ड) कालोपत्रका लागि दुई करोड ५० लाख, बुद्धसिंह मार्ग (पहिलो खण्ड) बहुवर्षे योजनाका लागि दुई करोड ५० लाख, मानपुर डेडगाउँ (घिरिङ तनहुँदेखि बौदीकाली नवलपुर) सडकका लागि रु. दुई करोड ५० लाख, शुक्लागण्डकी ५ र ८ जोड्ने सेतीनदी पक्की पुलका लागि दुई करोड ५० लाख विनियोजन भएको छ ।

शुक्लागण्डकी १० र भिमाद ८ जोड्ने क्याङ्दी खोलाको पिप्लेमा सडक पुलका लागि दुई करोड ५० लाख, तल्लो डुम्रे मोटरेवल पुलका लागि दुई करोड ३६ लाख ८२ हजार, कुलुङ खोला पुल भिमाद १ डुम्रीबेँसीका लागि दुई करोड १६ लाख ५६ हजार, झापुटार–काहुँ मोटरमार्ग स्तरोन्नतिका लागि दुई करोड, सहिद लालध्वज मार्ग निर्माण तथा स्तरोन्नतिका लागि दुई करोड, भानु मार्ग चन्द्रावती पोखरीछाप पुलिमराङ हुँदै कुन्छाफेदी सडकका लागि दुई करोड, आँबु–भाँगे–छिम्केश्वरी–हिलेखर्क मार्गका लागि रु दुई करोड, दुलेगौँडा हर्कपुर मार्ग (वनकेवा मनपाङ रानीटारी खण्ड) कालोपत्रका लागि रु. दुई करोड र सिन्धु मार्गका लागि रु. दुई करोड विनियोजन भएको कार्यालयले जनाएको छ ।