भारतीय चर्चित खेलाडी शिखर धवनको अर्धशतक मद्दतमा कर्णाली याक्सले नेपाल प्रिमियर लिगको छैटौँ खेलमा काठमाडौं गुर्खाजलाई १५० रनको लक्ष्य दिएको छ ।
बुधबार कीर्तिपुरस्थित त्रिवि क्रिकेट मैदानमा टस हारेर ब्याटिङ गरेको कर्णाली याक्सले पूरा २० ओभरमा पाँच विकेट गुमाउँदै १४९ रन बनायो । कर्णालीका लागि भारतीय चर्चित खेलाडी शिखर धवनले ५२ बलमा चार चौका र पाँच छक्कासहित सर्वाधिक ७२ रन बनाए । उनले पूरा २० ओभर नै खेलेका थिए ।
एनपिएलको आफ्नो दोस्रो खेलमा धवनले ४२ बलमा समान तीन चौका र छक्कासहित ५१ रन बनाएका हुन् । १७.५ ओभरमा उनले अर्धशतक बनाउँदा कर्णालीले पाँच विकेट गुमाउँदै १२४ रन बनाएको थियो । पहिलो खेलमा जनकपुरविरुद्ध धवनले १४ रन बनाएका थिए ।
कर्णाली याक्सले पावर प्लेमा सुस्त सुरुवात गर्दै दुई विकेट गुमाएर ३९ बनायो । धवनले मात्रै ६ बल खेलेर चार रन बनाएका थिए । धवनसँगै ओपनिङमा आएका देव तीन बल खेलेर डकआउट भए । तेस्रो नम्बर क्रिजमा आएका चाडविक वाल्टनले १५ बलमा पाँच चौकासहित २१ रन बनाएका हुन् ।
बाबर हायत पनि १९ बलमा एक चौकासहित १० रनमा पेभिलियन पर्किएपछि ८.१ ओभरमा कर्णालीले तीन विकेट गुमाउँदा मात्र ४९ रन बनाएको थियो । पाँच नम्बरमा क्रिजमा आएका गुल्सन झा पनि १९ बलमा एक चौकासहित १२ रन बनाएर स्टम्पिङ भए ।
१४.३ ओभरमा पाँचौँ विकेटको रूपमा चार रन जोेडेका अर्जुन घर्ती आउट हुँदा कर्णालीले जम्मा ८४ रन जोड्यो । ओमानका जिसन मक्सुदले ११ बलमा १४ रन बनाए । काठमाडौं गुर्खाजका लागि नामिबियाका कप्तानसमेत रहेका गेहार्ड इरास्मसले दुई विकेट लिए ।
कप्तान करण केसी, नाथन सोब्टर, दीपेश कँडेलले समान एक विकेट लिएका थिए । यसअघि कर्णाली जनकपुर बोल्ट्ससँग आठ विकेट र काठमाडौं चितवन राइनोजसँग पाँच विकेटले पराजित भएका थिए । दुवै टोली पहिलो जितको खोजीमा छन् ।
