नयाँदिल्लीमा रहेका उद्योगमन्त्री दामोदर भण्डारीले भारतका विदेशमन्त्री एस जयशंकर, वाणिज्यमन्त्री पीयूष गोयल र पेट्रोलियम तथा प्राकृतिक ग्यासमन्त्री हरदीपसिंह पुरीसँग भेटेर वाणिज्य सन्धि पुनरावलोकनदेखि पेट्रोलियम परियोजनालाई शीघ्र अगाडि बढाउने विषयमा गरे छलफल
भारतीय पक्षसँग मन्त्री भण्डारीले उठाएका विषय
- बैतडीको झुलाघाट सीमामा मोटरेबल पुल
- २३ पुसभित्र काठमाडौंमा आइजिसी बैठक
- नेपालको गुणस्तर प्रमाणीकरणलाई मान्यता
- वाणिज्यमन्त्री पीयूष गोयललाई निम्तो
- पेट्रोलियम परियोजनाको शीघ्र निर्माण सुरु
- द्विदेशीय लगानी विस्तार र सहयोग वृद्धि
भारत भ्रमणमा रहेका उद्योग, वाणिज्य तथा आपूर्तिमन्त्री दामोदर भण्डारीले त्यहाँका तीन मन्त्रीसँग भेटेर दुईदेशीय पारस्परिक सहयोग र आर्थिक मुद्दाकेन्द्रित छलफल गरेका छन् ।
मन्त्री भण्डारीले सोमबार साँझ भारतीय विदेशमन्त्री एस जयशंकरसँग भेट गरेर बैतडीको झुलाघाटस्थित महाकाली नदीमा निर्माणाधीन मोटरेबल पुलको काम चाँडो सक्ने विषयमा छलफल गरेको जानकारी दिए । सो क्रममा जयशंकरले पुल निर्माणको विषयमा थप अध्ययन गरी चाँडो सक्ने कार्यमा पहल गर्ने बताएका थिए ।
झुलाघाटमा मोटरेबल पुल निर्माण भए सुदूरपश्चिमका सात पहाडी जिल्लालाई व्यापार तथा पर्यटन प्रवर्द्धनमा सघाउ पुग्नेछ । यहाँ करिब पाँच सय मिटर लामो पुल बनाउनुपर्ने र साढे चार अर्ब रुपैयाँ लागत लाग्ने यसअघि नै अध्ययन भइसकेको छ ।
नयाँदिल्लीमा आयोजना गरिएको ‘२९औँ पार्टनरसिप समिट’मा सहभागी हुन गएका मन्त्री भण्डारीले सोमबार साँझ जयशंकरसँग अलग्गै भेट गरेका थिए । सो क्रममा दोधारा–चाँदनी सुक्खा बन्दरगाह निर्माण तथा भारतीय अनुदानमा निर्माण हुने पेट्रोलियम परियोजनाबारे छलफल भएको मन्त्री भण्डारीले जानकारी दिए ।
त्यस्तै, मंगलबार दिउँसो मन्त्री भण्डारीले भारतीय समकक्षीसमेत रहेका वाणिज्य तथा उद्योगमन्त्री पीयूष गोयलसँग भेट गरेका थिए । पूर्वअर्थमन्त्रीसमेत रहेका गोयलसँगको भेटमा लामो समयदेखि रोकिएको नेपाल–भारत अन्तरसरकारी समिति (आइजिसी)को बैठक आगामी २३ पुसभित्र गर्ने सहमति जुटेको छ । ‘विविध कारणले आइजिसी बैठक बस्न ढिलाइ भएको छ । त्यसैले हामीले आउँदो डिसेम्बर अन्तिम वा जनवरी पहिलो साताभित्र आइजिसी बैठक राख्न गरेको प्रस्तावलाई भारतीय पक्षले सकारात्मक रूपमा लिएको छ,’ मन्त्री भण्डारीले भने ।
त्यस्तै, दुईदेशीय वाणिज्य सन्धिलाई पुनरावलोकन गर्न पनि मन्त्री भण्डारीले प्रस्ताव गरेका थिए । गोयलले अन्तरसरकारी समितिबाटै वाणिज्य सन्धि संशोधनको विषय टुंगो लगाउने गरी तयारी गर्ने जवाफ दिएका थिए । नेपालले संशोधनसहित वाणिज्य सन्धि नवीकरण गर्नुपर्ने प्रस्ताव बारम्बार गर्दै आए पनि भारतले अस्वीकार गरेका कारण गत वर्ष संशोधनविनै वाणिज्य सन्धि नवीकरण भएको थियो ।
त्यस्तै, भारतको सस्तो कृषिउपज आयातमा नेपालले भन्सार लगाउन चाहेर पनि भारतले मानेको छैन । अहिले दुवै देशका कृषिउपज विनाभन्सार शुल्क निर्यात गर्न पाउने प्रावधान छ । त्यस्तै, दुवै देशको गुणस्तर मापदण्डलाई एक–अर्कालाई मान्यता दिने समझदारीविपरीत पछिल्लो समय भारतले नेपालको गुणस्तर प्रमाणीकरणलाई स्वीकार गर्न आलटाल गर्दै आएको छ । सो विषय पनि मन्त्री भण्डारीले भेटमा उठाएको जानकारी दिए ।
त्यसैगरी, विश्व व्यापार संगठनको मान्यताअनुसार नेपालको उत्पादनमा २० प्रतिशत मूल्य अभिवृद्धि भएका वस्तुलाई विनाभन्सार निर्यात सुविधा दिन भारतले आनाकानी गरिरहेको छ । आउँदो आइजिसी बैठकमा यी विषय उठाउने नेपालको तयारी छ । आइजिसी बैठक काठमाडौंमा बस्ने समझदारी छ ।
नेपाल पनि चाँडै लगानीसम्बन्धी सम्मेलन गर्ने र सहभागी हुन वाणिज्यमन्त्री गोयललाई आमन्त्रण गरेको मन्त्री भण्डारीले जानकारी दिए ।
मन्त्री भण्डारीले मंगलबार दिउँसो भारतको पेट्रोलियम तथा प्राकृतिक ग्यासमन्त्री हरदीपसिंह पुरीसँग भेट गरेका थिए । सो भेटमा भारतीय अनुदानमा बन्ने सिलगुडी–झापा पेट्रोलियम पाइपलाइन र भण्डारणगृह तथा अमलेखन्ज–लोथर पाइपलाइन निर्माणलाई छिटो सुरु गर्नेबारे छलफल भएको छ । त्यस्तै, त्रिभुवन विमानस्थलस्थित हवाई इन्धन डिपो स्थानान्तरणका लागि भारतीय पक्षको प्राविधिक सहयोग लिने विषयमा पनि सहमति जुटेको उनको भनाइ छ । नयाँदिल्लीमा आयोजित समिटका माध्यमबाट भने उद्योगमन्त्री भण्डारीले नेपालमा लगानीका लागि भारतसहितका लगानीकर्तालाई आह्वान गरेका थिए ।
