घरेलु तथा साना उद्योग कार्यालय गुल्मीले उद्यमी बनाउन विभिन्न सीपका कार्यक्रम सञ्चालन गरेको छ । जिल्लाका पाँच स्थानीय तहका एक सयभन्दा बढी व्यक्तिलाई उद्यमी बनाएर स्वरोजगार सिर्जना गर्न विभिन्न तालिम सञ्चालन गरिरहेको छ । इस्मा, छत्रकोट, मालिका, रुरु क्षेत्र गाउँपालिका र मुसीकोट नगरपालिकाका एक सयभन्दा बढी व्यक्तिलाई स्लेट ढुंगा बनाउने, मोटरसाइकल मर्मत, कफी उत्पादन र प्रवर्द्धन तथा उखुको चकलेट बनाउने तालिम सञ्चालन गरेको कार्यालयले जनाएको छ ।
इस्मा गाउँपालिकाका १७ जनालाई स्लेट ढुंगा कटिङ तालिम प्रदान गरिएको छ । १५ दिनसम्म सञ्चालन गरिएको तालिममा रुकुमका प्रेमप्रकाश ओली र धनार्जीका जगुलाल भण्डारीले सहभागीहरूलाई स्लेट ढुंगा काट्ने तरिका, त्यसलाई आकार दिने र सजावट सामग्री तयार गर्ने कला र सीप अभिवृद्धि गरेका थिए ।
लामो समय विदेशमा काम गरेर गाउँ फर्किएका इस्मा गाउँपालिका– ३ का प्रशिक्षार्थी यमराज महतले सीप सबैभन्दा ठुलो कुरा भएको बताउँदै सबैलाई व्यवहारमा प्रयोग गर्न आग्रह गरे । उनले आफूले परदेशमा सीप के हो भन्ने कुरा राम्रोसँग बुझेर फर्किएकाले निःशुल्क रूपमा घरआँगनमा पाएको सीपको सदुपयोग आवश्यक रहेको बताए ।
लामो समयदेखि गाउँकै ढुंगाको काम गर्दै आएका लोकबहादुर महतले तालिमले मिस्त्री बनाएको बताए । उनले सके उद्योग नै सञ्चालन गर्ने र नसके ढुंगाकै काम पनि स्तरीय सुविधासहित पाउने आशा व्यक्त गरे । इस्मा गाउँपालिका– ३ का वडाध्यक्ष ज्योतिराज कुँवरले ढुंगाको सम्भावना राम्रो भएको वडामा ठुलो मिहिनेतले सञ्चालित तालिमले सीप प्राप्त सबै व्यक्तिले एकीकृत रूपमा काम गर्नुपर्नेमा जोड दिए ।
इस्मा गाउँपालिकाका पूर्वअध्यक्ष लक्ष्मण विष्टले सरकार र नागरिककै बिचमा राम्रो तालमेल नभएका कारण तालिमका परिणाम सही रूपमा निस्कन नसकेको बताए । कोष तथा लेखा नियन्त्रण कार्यालय गुल्मीका प्रमुख हरिहर शर्मा तिवारीले परदेश मोहले गाउँमा सीपयुक्त जनशक्ति नै नभएका कारण परनिर्भरता बढ्दै गएको बताए । उनले तालिममा राज्यको थुप्रै लगानी भएकाले सीपलाई आयआर्जनमा सदुपयोग गर्न आग्रह गरे ।
तालिमका सहभागीलाई प्रमाणपत्र प्रदान गर्दै इस्मा गाउँपालिकाकी उपाध्यक्ष तथा अधिवक्ता पार्वती कुँवरले माटो र माग सुहाउँदो तालिम भएकोप्रति खुसी व्यक्त गरिन् । उनले कानुनी जटिलताको कारण ढुंगा उद्योग सञ्चालनमा समस्या भए पनि तालिमका सहभागीले प्राप्त गरेको सीपलाई सदुपयोग गर्न सल्लाह गरेर पालिकाले अनुकूल काम गर्ने बताइन् । उनले स्थानीय स्राेत र साधनको उपयोगलाई गाउँपालिकाले प्राथमिकता दिएकाले पालिकाभित्रका मठमन्दिर र पर्यटकीय स्थलहरूमा स्थानीय ढुंगाको प्रयोग गरिरहेको बताइन् ।
घरेलु तथा साना उद्योग कार्यालय गुल्मीका प्रमुख राजीव अर्यालले सीप जीवनमा महत्त्वपूर्ण हुने भएकाले तालिममा सहभागीहरूले व्यावसायिक योजना निर्माण गरेर अगाडि बढ्न आग्रह गरे । काम र लगानी गर्ने इच्छाशक्ति भए तीन तहका सरकार सहयोग गर्न तयार भएकाले तत्काल सीपको उपयोग र अर्थोपार्जनका लागि अगाडि बढ्न अर्यालले सुझाव दिए ।
