सरकारले राष्ट्रिय कर दिवसका अवसरमा उत्कृष्ट करदातालाई सम्मान गरेको छ। आन्तरिक राजस्व विभागले आर्थिक वर्ष ०७९/८० मा सबैभन्दा बढी कर तिरेका करदातालाई राष्ट्रिय कर दिवस तथा कर सप्ताहका अवसरमा आज सम्मान गरेको हो।
अघिल्लो आर्थिक वर्षमा सबैभन्दा बढी आयकर नेपाल दूरसञ्चार कम्पनी लिमिटेडले तिरेको छ। एकलौटी फर्ममध्ये सबैभन्दा बढी आयकर दाखिला गरेबापत श्रुति ट्रेडर्सलाई पनि सम्मान गरिएको छ।
वस्तु निर्यात कारोबार गर्ने कम्पनीतर्फ सबैभन्दा बढी आयकर डाबर नेपाल, सूचना प्रविधि सेवा निर्याततर्फ कोडाबतार टेक, कृषि एवं पशुपन्छी क्षेत्रतर्फ बढी आयकर पतञ्जली आयुर्वेद, बैंक वित्तीय संस्था र बिमाको कारोबार गर्ने कम्पनीतर्फ नबिल बैंक लिमिटेडलाई सबैभन्दा बढी आयकर तिर्ने कम्पनीका रूपमा सम्मान गरिएको छ।
स्वास्थ्य तथा शैक्षिक संस्थातर्फ लुम्बिनी मेडिकल कलेज एन्ड टिचिङ हस्पिटल लिमिटेड, पर्यटन व्यवसायतर्फ तारागाउँ रिजेन्सी होटेल लिमिटेड, वस्तु व्यापार गर्ने कम्पनीमा भाटभटेनी सुपर मार्केट एन्ड डिपार्टमेन्टल स्टोरलाई उत्कृष्ट करदाताका रूपमा सम्मान गरिएको छ।
गत आर्थिक वर्षमा ५० करोडदेखि एक अर्बसम्मको कारोबार गर्ने कम्पनीतर्फ सिडिएस एन्ड क्लियरिङ लिमिटेड उत्कृष्ट करदाताका रूपमा सम्मानित भएको छ। ऊर्जामूलक उद्योगतर्फ भोटेकोशी पावर कम्पनी, रेमिटेन्स तथा मनी ट्रान्सफर्मर कारोबार गर्ने कम्पनीमा सिटी एक्स्प्रेस मनी ट्रान्सफरलाई उत्कृष्ट करदाताका रूपमा सम्मानित भएका छन्।
व्यक्तिगत आयकरतर्फ सबैभन्दा बढी कर तिर्ने करदाताका रूपमा राजबहादुर शाह सम्मानित भए। ०७५ साउनदेखि ०८१ असार मसान्तसम्म तोकिएको समयमा नियमित र सबैभन्दा बढी मूल्य अभिवृद्धि कर तिर्ने कम्पनीका रूपमा होङ्सी शिवम् सिमेन्टलाई सरकारले सम्मान गरेको छ ।
वार्षिक ५० करोडसम्म कारोबार गर्ने करदातामध्ये सोल्टी इन्टरप्राइजेज र विशेष उद्योगतर्फ सबैभन्दा बढी आयकर दाखिला गरेबापत बरुण बेभरेजलाई सम्मान गरिएको छ। कर दिवसका अवसरमा उत्कृष्ट कार्यसम्पादन गर्ने कार्यालयहरू पनि सम्मानित भएका छन्। लगातार बढी कर तिर्ने सूचीको उपल्लो तहमा पर्दै आएको सूर्य नेपाल ०८०/८१ मा परेन।
सरकारलाई सबैभन्दा धेरै कर तिर्नेहरू
१. एकलौटी फर्महरूतर्फ : श्रुति ट्रेडर्स
२. सूचना प्रविधितर्फ : कोडाबतार टेक प्रालि
३. निर्यात कारोबार : डाबर नेपाल प्रालि
४. कृषि एवं पशुजन्य : पतञ्जली आयुर्वेद प्रालि
५. बैंक तथा वित्तीय संस्था : नबिल बैंक लिमिटेड
६. स्वास्थ्य तथा शिक्षा : लुम्बिनी मेडिकल कलेज
७. पर्यटन : तारागाउँ रिजेन्सी
८. वस्तु व्यापार : भाटभटेनी सुपरमार्केट
९. मध्यस्तरीय करदाता : सिडियस एन्ड क्लियरिङ लिमिटेड
१०. ऊर्जा : भोटेकोशी पावर कम्पनी
११. रेमिटेन्स : सिटी एक्सप्रेस
१२. व्यक्तिगत आयकर : राजबहादुर साह
१३. मूअकर समयमा तिर्नेमध्ये : होङ्सी सिमेन्ट
१४. ५० करोडभन्दा धेरै कारोबार गर्नेमध्ये : सोल्टी होटेल
१५. विशेष उद्योग : बरुण बेभरेज प्रालि
