विन्टर सेड्युल अनुमति नलिई नेपाली आकाशमा अनधिकृत प्रवेश गरेको थाई एयर एसिया कारबाहीमा परेको छ। नेपाल नागरिक उड्डयन प्राधिकरण (क्यान)ले अर्को निर्णय नभएसम्मका लागि भन्दै थाई एयर एसियाको सम्पूर्ण उडान र जिएसए इजाजत निलम्बन गरिदिएको छ।
थाई एयर एसियाको एयरबस ३२० जहाज थाइल्यान्डबाट १५० भन्दा बढी यात्रु बोकेर दिउँसो २ बजे काठमाडौं आएको थियो । तर, नेपालमा उडान अनुमतिको म्याद सकिएको हुनाले क्यानले अवतरणको अनुमति दिएन । करिब एक घण्टा आकाशमा फन्को मारेपछि यात्रुको सुरक्षा र मानवीयताका आधारमा जहाजलाई अवतरण गर्न दिइएको क्यानले जनाएको छ । जहाज करिब २ बजे त्रिभुवन अन्तर्राष्ट्रिय विमानस्थलमा अवतरण गरेको थियो ।
थाई एयर एसियालाई शनिबारसम्मका लागि नेपालमा उडान–अवतरण अनुमति दिइएको थियो । आइतबारदेखि विन्टर सेड्युल लागू भइसकेको हुँदा उडान अनुमतिको म्याद सकिएको क्यानका सहप्रवक्ता ज्ञानेन्द्र भुलले बताए ।
