जिल्ला अदालत बागलुङले ढोरपाटन नगरपालिका प्रमुख तथा इमेज बचत तथा ऋण सहकारीका संस्थापक अध्यक्ष देवकुमार नेपालीलाई पुर्पक्षका लागि थुनामा राख्न आदेश दिएको छ ।
मंगलबार थुनछेक बहसपछि जिल्ला न्यायाधीश रमेशकान्त अधिकारीको इजलासले नेपालीलाई पुर्पक्षका लागि कारागार चलान गर्न आदेश दिएको अदालका इजलास अधिकृत ऋषिराम रिजालले जानकारी दिए ।
सहकारीको बचत रकम अपचलन गरेको आरोपमा १६ महिनादेखि फरार नेपालीलाई केन्द्रीय अनुसन्धान ब्युरोले शनिबार भारतबाट पक्राउ गरी नेपाल ल्याएर जिल्ला अदालतमा सोमबार पेस गरेको थियो । नेपालीको बयान सोमबार नै सकिएको थियो ।
सहकारी ठगीमा अध्यक्ष नेपालीसहित सञ्चालकविरुद्ध कास्कीका ५२४ र बागलुङका एक हजार ५४३ बचतकर्ताले गत वर्ष जेठमै उजुरी दिएका थिए । सहकारीका बचतकर्ताको दुई अर्ब बचत रकम हिनामिना गरी ५ जेठ ०८० मा उनी बुर्तिबाङ बजारबाट सपरिवार फरार भएका थिए ।
नेपालीसँगै पक्राउ परेका ओमप्रसाद दर्जीलाई एक लाख ५० हजार धरौटीमा छोड्न अदालतले आदेश दिएको छ । यो मुद्दामा सहकारीका अन्य पदाधिकारी र कर्मचारी चित्रबहादुर भण्डारी, नरमती बुढा, शक्ति किसान, डोरबहादुर परियार र अनिता बुढामगर पक्राउ परिसकेका छन् । उनीहरूलाई जिल्ला अदालतको ५ साउन ०८० को आदेशले पुर्पक्षका लागि थुनामा पठाएको छ । भण्डारी, बुढा र किसान थुनामा छन् । परियार र बुढामगर ०८१ पुस पहिलो साता पक्राउ परेर पुर्पक्षका लागि कारागारमा छन् ।
सोमबार अदालतमा बयान दिने क्रममा मेयर नेपालीले आफू मेलमिलाप गर्न आएको बताएका थिए । ‘म सबै बचतकर्ताको रकम फिर्ता गर्छु । यसका लागि सुरुमा हिसाब गर्नुपर्छ, बचतकर्ताले पाउनुपर्ने पैसा कति हो, ऋण लगेकाले कति तिर्न बाँकी छ, सम्पूर्णको हरहिसाब आउनुपर्यो । मेरो र श्रीमतीको नाममा रहेका घरजग्गा बिक्री गरेर मैले तिर्नुपर्ने पैसा तिर्न तयार छु,’ उनले भनेका थिए ।
