राष्ट्रपति रामचन्द्र पौडेलले नेपालमा साहसिक खेलको प्रचुर सम्भावना रहेको बताउँदै यस सम्बन्धमा अन्तर्राष्ट्रिय जगतमा सन्देश प्रवाह गर्न आह्वान गरेका छन्।
एसियाली खेलकुद पत्रकार महासंघ (एआइपिएस एसिया) कंग्रेसमा सहभागी हुन विभिन्न देशबाट काठमाडौं आएका खेल पत्रकार र पदाधिकारीलाई राष्ट्रपति भवन शीतलनिवासमा स्वागत गर्दै राष्ट्रपति पौडेलले नेपाल खेलकुद र खेलाडीको उर्वर देश भएकाले विश्व खेलक्षेत्रमा नेपालबारे प्रचार गर्न आह्वान गरे।
राष्ट्रपति पौडेलले भने, ‘नेपालमा साहसिक र हाई अल्टिच्युड खेल, अल्ट्रा दौडको धेरै सम्भावना छ। एभरेस्ट म्याराथनमा नेपाली खेलाडीले गिनिज बुकमा नाम लेखाइसकेका छन्।’ हालै पेरिसमा सम्पन्न पाराओलम्पिकमा पलेसा गोबर्द्धनले तेक्वान्दोमा पदक जितेर देशको गरिमा बढाएको बताए।
नेपालको परिचय सगरमाथा र बुद्धको जन्मस्थल मात्र नभई खेलकुद क्षेत्र पनि भएको सन्देश विश्व समुदायसमक्ष प्रवाह गर्न आवश्यक रहेको राष्ट्रपति पौडेलले बताए। उनले राष्ट्रका उत्कृष्ट खेलाडीलाई निरन्तर सम्मान गरेर एआइपिएस एसियाले असल परम्परा स्थापित गरेकामा त्यसको सरहाना गरे।
