अखिल नेपाल फुटबल संघ (एन्फा)ले दुई वर्षपछि आयोजना गरेको महिला लिग फुटबल प्रतियोगिताको आइतबारको उद्घाटन खेलमा कोशी प्रदेशले स्याङ्जाको वालिङ नगरपालिकामाथि ४–० को सानदार जित निकालेको छ ।
कोशीलाई जित दिलाउन समीक्षा मगरले दुई गोल गरिन् । कोशीकी सञ्जुमाया तामाङले एक गोल थपिन् । कोशीले एक गोल आत्मघाती उपहार पाएको थियो । कोशीले पहिलो हाफमा एक गोलको अग्रता लिएको थियो । कोशीले दोस्रो हाफमा तीन गोल थप्यो ।
कोशीका प्रशिक्षक श्याम मानन्धरले टोलीले जित हात पारे पनि रणनीतिअनुसार खेल नभएको बताए । प्रतियोगिताका लागि कोशीले तीन विदेशी खेलाडी ल्याए पनि कानुनी प्रक्रिया पूरा नहुँदा मैदानमा उतार्न पाएन । कोशीले विदेशी खेलाडीका रूपमा सुमिता सरकार, तमलिका सरकार र भुली सरकारलाई अनुबन्ध गरेको छ । कोशी सुर्खेतमा भएको राष्ट्रिय महिला लिगको विजेतासमेत हो । वालिङका प्रशिक्षक दिलीप थापाले खेलाडीले योजनाअनुसार प्रदर्शन गर्न नसकेको बताए ।
लिगमा १० टोली सहभागी छन् । नेपाल पुलिस, एपिएफ र आर्मीसँगै कोशी, बागमती नगरपालिका, चन्द्रपुर नगरपालिका, संकटा क्लब, वालिङ नगरपालिका, सुदूरपश्चिम र कर्णालीले प्रतिस्पर्धा गरिरहेका छन् । पहिलो चरणपछि शीर्ष पाँच स्थानमा रहने टोली दोस्रो चरणमा प्रवेश गर्नेछन् । ‘डबल राउन्ड रोबिन’ पद्धतिमा पाँच टोलीबीच प्रतिस्पर्धा हुनेछ । दोस्रो राउन्डबाट शीर्ष चार टोलीले प्लेअफमा स्थान बनाउनेछन् ।
