नगरभित्रका ग्रामीण क्षेत्रहरूलाई धनगढी मुख्य बजारसँग यातायात सुविधा जोड्न धनगढी उपमहानगरपालिकाले नगर बस सञ्चालनको तयारी गरेको छ । उपमहानगरले दुई करोड ४८ लाख रुपैयाँको लागतमा ६ वटा आधुनिक बस खरिद गरेर सञ्चालनका लागि प्रक्रिया अगाडि बढाएको हो । कैलारी गाउँपालिकासँग जोडिएको धनगढीको पूर्वी ग्रामीण क्षेत्र फूलबारी तथा गोदावरी नगरपालिकासँग जोडिएका बस्तीदेखि धनगढी बजारसम्म नगर बस सञ्चालन गरिने उपमहानगरले जनाएको छ । ३२ सिट क्षमताका नगर बस टेन्डरमार्फत छनोट हुने निजी कम्पनी वा फर्मले सञ्चालन गर्नेछन् । बस सञ्चालन हुने रुट र भाडा भने उपमहानगरले तोक्ने बताइएको छ ।
नगर प्रमुख गोपाल हमालले ग्रामीण भेगका बासिन्दालाई बजारसम्म आउजाउ गर्न सहज आवागमनका लागि नगर बस सञ्चालन गर्न लागिएको बताए । नगर बस सञ्चालन भए ग्रामीण क्षेत्रका कृषकलाई कृषिउपज बसबाट बजार ल्याएर बिक्री गर्न सहज हुनुका साथै बिरामी र विद्यार्थीसमेत लाभान्वित हुने उनले बताए । ‘कृषकलाई आफूले उत्पादन गरेका वस्तु बजार ल्याएर बिक्री गर्न समस्या छ,’ नगर प्रमुख हमालले भने, ‘ग्रामीण क्षेत्रबाट उपचारका लागि बजार आउने अशक्त, बिरामी र अध्ययनका लागि बजारमा डेरा लिएर बस्नुपर्ने विद्यार्थी नगर बस सञ्चालन भए लाभान्वित हुनेछन् ।’ बजारसँग यातायात जोडेर ग्रामीण भेगलाई चलायमान बनाउन नगर बस सञ्चालन गर्न लागिएको उनले बताए ।
धनगढी बजार क्षेत्रका विद्यालय तथा क्याम्पसमा पढ्ने ग्रामीण भेगका विद्यार्थीलाई आउन–जान पनि सहज हुने उपमहानगरले जनाएको छ । ‘ग्रामीण भेगलाई सहरसँग जोडेर ग्रामीण जीवनलाई चलायमान बनाउन खोजेका हौँ,’ हमालले भने, ‘त्यसको कडीका रूपमा नगर बस सञ्चालन गर्दै छौँ ।’ सुरुमा फूलबारीलाई केन्द्रमा राखेर नगर बस सञ्चालन गरिने र उर्मालगायत ग्रामीण क्षेत्रमा पनि नगर बस विस्तार गर्दै लैजाने योजना रहेको उनले बताए । उपमहानगरका आइटी इन्जिनियर अनुप भट्टले सुरक्षाका लागि नगर बसमा सिसी क्यामराका साथै जिपिएस सिस्टम पनि जडान गरिएको जानकारी दिए ।
जिपिएस सिस्टमबाट सेवाग्राहीले मोबाइल एप्सको प्रयोग गरेर नगर बस कहाँ पुग्यो भनेर पनि हेर्न सकिने उनले बताए ।
नगर बसमा सुदूरपश्चिमका विभिन्न समुदायको कला, संस्कृति, वेशभूषा झल्कने पहिरन तथा यहाँका पर्यटकीय गन्तव्यका तस्बिर टाँसिएका छन् । विभिन्न समुदायको संस्कृति र पर्यटकीय क्षेत्रको पहिचानका लागि नगर बसमा फोटोहरू टाँसिएको उपप्रमुख कन्दकलाकुमारी रानाले बताइन् । नगरवासीको सुविधालाई ध्यानमा राखेर नगर बस सञ्चालनमा ल्याउन लागिएको उनको भनाइ छ ।
