एमालेले संसदीय दलका नेता लीला गिरीलाई पन्छाएर उपनेता चेतनारायण आचार्यलाई लुम्बिनीको मुख्यमन्त्री बनाएको छ । आचार्यलाई सोमबार प्रदेश प्रमुख अमिक शेरचनले मुख्यमन्त्री नियुक्त गरे । आचार्यलाई मुख्यमन्त्री बनाउन एमाले र कांग्रेसका ५६ सांसदको समर्थन छ । यहाँ ८७ सदस्यीय प्रदेश सभा छ ।
मुख्यमन्त्री जोखबहादुर महराले राजीनामा दिएसँगै गिरीलाई अगाडि सार्न कांग्रेस–एमालेबाट हस्ताक्षरसमेत संकलन भएकामा सोमबार एकाएक केन्द्रबाट फरक निर्देशन आएपछि आचार्यले मौका पाएका हुन् । नवनियुक्त मुख्यमन्त्री आचार्यले बुधबार शपथग्रहण गर्ने कार्यक्रम छ । शपथसँगै मन्त्रिमण्डल विस्तारको तयारी छ ।
अर्घाखाँचीबाट निर्वाचित आचार्य यसअघिका प्रदेश सरकारमा तीनपटक मन्त्री बनेका थिए । गिरी एमाले उपाध्यक्ष विष्णुप्रसाद पौडेलनिकट र आचार्य महासचिव शंकर पोखरेलनिकट हुन् ।
एमाले सांसद भूमिश्वर ढकालले ०७९ को निर्वाचनपछि पार्टीभित्र पहिलो चरणमा गिरी र पछि आचार्य मुख्यमन्त्री हुने सहमति भएको बताए । त्यसअनुसार गिरी यसअघि मुख्यमन्त्री बनेका थिए । नवनियुक्त मुख्यमन्त्री आचार्यले पार्टीमा गुट उपगुट नरहेको बताए ।
