सहकारी संस्था बचत रकम दुरुपयोग सम्बन्धमा संसदीय छानबिन विशेष समितिले मंगलबार पूर्वमहालेखापरीक्षक एवं सहकारी विभागका पूर्वरजिस्ट्रार टंकमणि शर्मा, सहकारी मन्त्रालय पूर्वसचिव गोपीनाथ मैनाली, पूर्वसचिव डा. दामोदर रेग्मीसँग छलफल गरेको छ ।
सहकारी ऐनको निर्माण, नियमनको प्रबन्ध, सहकारी संकटलगायत विभिन्न संरचनाहरूको स्थापनालगायत संरचनाको कानुनी एवं व्यावहारिक अभ्यास र अनुभवको सम्बन्धमा सहकारी क्षेत्रका विज्ञका रूपमा महत्वपूर्ण छलफल भएको समिति सभापति सूर्य थापाले बताए ।
बैठकले आवश्यक कागजात मागिएका निकायसँग सम्पर्क व्यक्तिसहित फलोअप गर्ने, देशभरि राम्रो सञ्चालन भइरहेका सहकारीसँग प्रतिनिधिमूलक छलफल गर्ने, विभिन्न निकायसँग क्रस डिस्कसन मिटिङ र सहकारी संस्थाहरूका लेखापरीक्षकहरूको अनुभवमा आधारित छलफल गर्ने निर्णय पनि गरेको छ ।
समितिले रास्वपा सभापति एवं पूर्वगृहमन्त्री रवि लामिछानेसँग सहकारी बचत अपचलनका सम्बन्धमा सोधपुछ गर्ने भएको छ । सभापति थापाका अनुसार समितिको बैठकले विभिन्न व्यक्तिसँग गरिने सोधपुछको प्राविधिक तयारी र व्यवस्थापन गर्ने निर्णय गरेको छ ।
सोधपुछको सूचीमा कारागारमा रहेका सहकारी सञ्चालक तथा सहकारीको बचत अपलचन गर्ने कम्पनीका पदाधिकारी पनि छन् । गोरखा मिडिया नेटवर्कको तत्कालीन प्रबन्ध निर्देशकका रूपमा लामिछानेसँग सोधपुछ हुन लागेको हो ।
