एसियन थाई फुड्स प्रालि नाइजेरियाको लागोसमा आयोजित ‘फुड एन्ड बेभरेज वेस्ट अफ्रिका २०२४’ अन्तर्राष्ट्रिय व्यापारिक मेलामा सहभागी हुने नेपालको पहिलो कम्पनी बनेको छ । कम्पनी स्थापनाको २५ वर्षे अवधिमा नेपालको चाउचाउ र स्न्याक्स उत्पादको बाजार विश्वभरिका देशसम्म पुर्याउँदै सो मेलामा सहभागिता जनाई यस्तो उपलब्धि हासिल गरेको हो ।
कम्पनीले टुपिएम, रमपम र प्रीतिलगायतका लोकप्रिय ब्रान्ड उत्पादन गर्दै आएको छ । नेपाली कम्पनीले यो उपलब्धि हासिल गरेको पहिलो भएको कम्पनीको दाबी छ । कम्पनीका प्रबन्धक निर्देशक महेश जाजूले विश्व बजारमा नेपाली खाद्य उत्पादनप्रति पनि विशेष रुचि र आकर्षणको सम्भावना रहेको बताए । ‘यसै अनुभूतिका आधारमा हामीले बजार विस्तार गर्दै नेपालको निर्यात बढाउने लक्ष्य राख्यौँ,’ उनले भने, ‘अन्तर्राष्ट्रिय व्यापारिक मेला र प्रदर्शनीमा सहभागिता जनाउनु बजार विस्तारको रणनीति हो ।’
अहिले २६ भन्दा बढी देशमा आफ्ना उत्पादन निर्यात गरिरहेको कम्पनीले जनाएको छ । कम्पनीले अकबरे, कोरियन रैमन, किम्ची रैमन, नेपोलिटाना, मसरुम, स्रिम्प, सिफुडजस्ता नयाँ फ्लेबरमा विश्व बजारअनुरूपका कैयौँ प्रिमियम श्रेणीका चाउचाउ उत्पादन गर्दै आएको छ ।