कुवेतमा करिब दुई सय विदेशी कामदार रहेको एक भवनमा बुधबार बिहानै आगलागी हुँदा ४९ जनाभन्दा बढीको मृत्यु भएको छ । आगलागीबाट दर्जनौँ घाइते भएको अधिकारीहरूले बताएका छन् ।कुवेतको स्वास्थ्य मन्त्रालयका अनुसार राजधानी कुवेत सिटीको दक्षिणमा अवस्थित मंगफ क्षेत्रमा भएको आगलागीमा थप ४३ जना घाइते भएका छन् । मंगफ आप्रवासी कामदारहरूको बसोवास रहेको क्षेत्र हो ।
घटना बिहान ठीक छ बजे मंगफ क्षेत्रमा घटेको गृह मन्त्रालयअन्तर्गतको जनरल डिपार्टमेन्ट अफ क्रिमिनल इभिडेन्सका प्रमुख मेजर जनरल इद अल–ओवाइहानले भने ।भवनमा एक सय ९६ कर्मचारी बस्दै आएको अधिकारीले जानकारी दिएका छन् । तेलको धनी मुलुक कुवेतमा ठूलो संख्यामा विदेशी श्रमिक काम गर्छन् । प्रायः दक्षिण तथा दक्षिणपूर्वी एसियाका आप्रवासी निर्माण वा सेवा उद्योगमा संलग्न छन् । जनरल फायर डिपार्टमेन्टको एक स्रोतका अनुसार भुइँ तलामा आगो लागेपछि निस्केको धुवाँले पीडितहरू निस्सासिएका थिए ।
‘फोरेन्सिक टोलीले घटनास्थलमा अनुसन्धान गरिरहेको छ ।अहिलेसम्म तीन शवको सनाखत भएको छ,’ मेजर जनरल अल–ओवाइहानले भने । सबै पीडितहरूको राष्ट्रियता सार्वजनिक भइसकेको छैन, तथापि भारतीय मिडियाले मर्नेमध्ये अधिकांश भारतीय रहेको उल्लेख गरेका छन् । एक स्रोतलाई उल्लेख गर्दै ४१ जना मृतक भारतीय भएको लाइभमेन्टले लेखेको छ । भारतका विदेशमन्त्री एस. जयशंकरले सामाजिक सञ्जाल एक्समा घटनाको समाचारबाट स्तब्ध भएको बताएका छन् । साथै उनले दुःखद रूपमा ज्यान गुमाउनेहरूको परिवारप्रति गहिरो समवेदना व्यक्त गरेका छन् ।
कुवेतका गृहमन्त्री शेख फहद अल–युसेफले घटनास्थलको भ्रमण गर्दै सम्भावित लापरबाहीको जाँचका लागि भवनका मालिकलाई पक्राउ गरिएको जानकारी दिए । उनले सुरक्षा नियम उल्लंघन गरेर बनाइएका अन्य भवन तुरुन्त खाली गरिने चेतावनी दिए । ‘हामी कामदारको भिडभाडयुक्त बसोवास र उपेक्षा समस्यालाई सम्बोधन गर्न काम गर्नेछौँ ।
