अध्यक्षमा उपेन्द्र यादव नै सर्वसम्मत हुने सम्भावना, पदाधिकारीमा रस्साकस्सी
जनता समाजवादी पार्टी नेपालका अध्यक्ष उपेन्द्र यादवको राजनीतिक प्रतिवेदन केही सुझावसहित पारित भएको छ । ३१ पृष्ठको प्रतिवेदनमा आएका सुझावलाई समेटेर संशोधन गर्ने प्रतिबद्धता जनाएपछि महाधिवेशनको बन्दसत्रले यादवको राजनीतिक प्रतिवेदन पारित गरेको हो ।
यादवको राजनीतिक प्रतिवेदनमाथि बन्दसत्रमा १० वटा समूह बनाई छलफल गरिएको थियो । ती समूहले दिएको सुझावलाई समेटर प्रतिवेदन संशोधन गर्ने जनाएपछि प्रतिवेदन पारित भएको जसपा महाधिवेशन प्रतिनिधि रामआशिष यादवले बताए । महाधिवेशनको बन्दसत्रमा पूर्वमन्त्री विजय यादवले प्रस्तुत गरेको पार्टीको आय–व्यय प्रतिवेदन र लेखा आयोग प्रमुख अमरेशनारायण सिंहले प्रस्तुत गरेको लेखापरीक्षण प्रतिवेदन पनि पारित भएको उनले बताए ।
जसपा नेपालमा पार्टीको नारामा पहिचान शब्द जोडनुपर्ने, पार्टीको अधार क्षेत्र मधेश किटान गरी देशभरि संगठन निर्माण गर्नुपर्ने सुझाव आएको छ । मधेशलाई मरुभूमीकरण हुनबाट जोगाउन पार्टीले ठोस नीति र पहलकदमी लिनुपर्ने, जसपा नेपाललाई मात्रै विरोध गर्ने जनमत पार्टीलाई शत्रु दलका रूपमा घोषणा गर्ने सुझाव आएको छ । लोसपासहित विचार मिल्ने पार्टीसँग एकता गर्नेसहितका सुझाव आएको उनले बताए । महाधिवेशनबाट राजनीतिक, आर्थिक प्रतिवेदन पारित भएपछि बुधबारदेखि पदाधिकारी तथा कार्यकारिणी सदस्य चयन प्रक्रिया सुरु हुनेछ ।
जसपा नेपालको महाविधेशनबाट २० पदाधिकारीसहित दुई सय एकजना केन्द्रीय सदस्य र कार्यकारिणी सदस्य छनोट प्रक्रिया सुरु हुनेछ । महाधिवेशनले अध्यक्ष एक, सहअध्यक्ष एक, उपाध्यक्ष पाँच, महासचिव दुई, उपमहासचिव तीन, सचिव सात र कोषाध्यक्ष एक गरी दुई सय एक केन्द्रीय सदस्य र कार्यकारिणी सदस्य निर्वाचित गर्नेछ । अध्यक्षमा उपेन्द्र यादव नै सर्वसम्मत हुने सम्भावना प्रबल देखिए पनि पदाधिकारीमा भने रस्साकस्सी देखिएको छ । राजकिशोर यादवले अध्यक्षमा उम्मेदवारी नदिए सहअध्यक्ष पदमा उम्मेदवारी दिने सम्भावना छ । सो पदमा पूर्वमुख्यमन्त्री लालबाबु राउत, रकम चेमजोङ, विजय यादवलगायत आकांक्षी देखिएका छन् ।
उपाध्यक्षमा हरिनारायण यादव, पूर्वमुख्यमन्त्री सरोजकुमार यादव, शिवलाल थापा, सुमन चौधरी, किशोरी यादव, रामअवतार यादव, उर्मिला साह, रेखा यादवसहित आकांक्षी देखिएका छन् । महासचिवमा दीपक कार्की, रामकुमार शर्मा, प्रकाश अधिकारी र विजय यादवको चर्चा छ । उपमहासचिवमा शैलेन्द्रप्रसाद साह, योगेन्द्र यादव, सर्शराम यादव, निर्मला यादवलगायत आकांक्षी देखिएका छन् । सचिवमा डा. सुरेन्द्र यादव, सरोजकुमारसिंह कुसवाह, ज्ञानेन्द्रकुमार यादव, जितेन्द्र यादव, रामआशिष यादवलगायत चर्चामा छन् । कोषाध्यक्षमा बलराम महतो, प्रमिला यादवलगायत आकांक्षी देखिएका छन् ।