दमक–३ मा बनेको १८ तले भ्यु टावर
एक अर्ब ४५ करोड रुपैयाँ खर्चेर झापाको दमक–३, दापगाछीमा निर्माण भएको एक सय मिटर (१८ तले) अग्लो भ्यु टावर सञ्चालनको पर्खाइमा छ । फागुनमा निर्माण सकिए पनि सञ्चालन कार्यविधि नबन्दा भ्यु टावर उद्घाटन हुन नसकेको सघन सहरी तथा भवन निर्माण आयोजना कार्यालय झापाका प्रमुख सुदीप पौडेलले जानकारी दिए ।
१८ तलासम्म ७२ मिटर र थप २८ मिटर मेटल फ्रेमको टावर राखिएको छ । ‘भ्यु टावरको काम सम्पन्न भइसकेको छ । हामीले निर्माण कम्पनीलाई भुक्तानी पनि दिइसकेका छौँ । तर, निर्माण कम्पनीबाट हस्तान्तरण हुन बाँकी छ,’ प्रमुख पौडेलले भने, ‘हस्तान्तरणका लागि भ्यु टावर सञ्चालनसम्बन्धी कार्यविधि कसरी आउँछ ? हेर्दै छौँ । भ्यु टावर सञ्चालनसम्बन्धी कार्यविधि सहरी विकास मन्त्रालयमा छलफलका क्रममा छ । नीतिगत कारणले हस्तान्तरण र उद्घाटन ढिला भएको छ ।’ उनले कार्यविधि नआए नगरपालिकालाई हस्तान्तरण गरिने बताए ।
