कपिलवस्तुको वाणगंगामा आगलागी हुँदा करिब १२ लाखबराबरको क्षति भएको छ।
सोमबार बिहान करिब पौने १० बजेको समयमा विद्युत् सर्ट भएर आगलागी भएको हो। वाणगंगा- ८ पुल्चोकको खड्क कलौनीमा आगलागी भएको हो। आगलागीबाट एउटा बंगुर फर्म जलेर नष्ट भएको छ।
त्यस्तै, तीनवटा टहरा जलेर पूर्ण रूपमा नष्ट भएका छन्। स्थानीय दिलबहादुर थापाका ६ वटा माउ बंगुर र तीनवटा बंगुरका बच्चा मरेका छन्। बंगुर फर्ममा लागेको आगोका कारण साना–ठूला गरी करिब नाैवटा बंगुर मर्दा करिब आठ लाखबराबरको क्षति भएको छ।
यस्तै, केशवबहादुर थापा, दुधबहादुर चौधरी र बालकुमारी सुनारको घर जल्दा एक लाखको क्षति भएको इलाका प्रहरी कार्यालय पिपराका प्रमुख गोपालजंग रायमाझीले बताएका छन्।
केही घण्टापछि वाणगंगा, कपिलवस्तु र शिवराज नगरपालिकाको तीनवटा दमकल, एउटा ट्यांकर, जनपथ प्रहरी, सशस्त्र प्रहरी तथा स्थानीयको सहयोगमा आगाे नियन्त्रणमा आएको थियो।
