ठगीको आरोपमा प्रहरी नियन्त्रणमा रहेका शिव शिखर बहुउद्देश्यी सहकारीका चार सञ्चालकलाई थप अनुसन्धानका लागि कञ्चनपुर ल्याइएको छ । भक्तपुरमा केन्द्रीय कार्यालय भई विभिन्न जिल्लामा शाखा कार्यालय रहेको शिव शिखर सहकारीको ठगी प्रकरणमा पक्राउ परेका सञ्चालकलाई कञ्चनपुर ल्याइएको हो ।
जिल्ला प्रहरी कार्यालय कञ्चनपुरका प्रवक्ता प्रकाश डाँगीले पक्राउ परेका सञ्चालकहरू गीता शर्मा, केदार शर्मा, पुष्कर मल्ल र अमिसराज भण्डारीलाई जिल्ला ल्याइएको जानकारी दिए । प्रवक्ता डाँगीका अनुसार कञ्चनपुरस्थित सहकारीको शाखा कार्यालय महेन्द्रनगर, त्रिभुवन बस्ती, बेलौरीका बचतकर्ताबाट आएको उजुरीमाथि अनुसन्धानका लागि उनीहरूलाई जिल्ला झिकाइएको हो ।
आरोपितलाई यसअघि नै केन्द्रीय अनुसन्धान ब्युरो (सिआइबी)ले पक्राउ गरिसकेको थियो । ‘ती सञ्चालकविरुद्ध जिल्लामा समेत उजुरी परेकाले उनीहरूलाई झिकाएर अनुसन्धान अघि बढाएका छौँ,’ प्रवक्ता डाँगीले भने । कञ्चनपुरमा उक्त सहकारीले करोडौँ रकम हिनामिना गरेको उजुरी परेको छ । तीन हजार ६७१ बचतकर्ताले ३१ करोड, ९७ लाख, तीन हजार, नौ सय ५५ रुपैयाँ ठगी गरेको भन्दै प्रहरीमा निवेदन दिएका छन् । सहकारीको ठगी प्रकरण सार्वजनिक भएयता जिल्लाका तीनवटै शाखा कार्यालय बन्द छन् ।
