चाडबाडका वेलामा हुने बिदालाई सदुपयोग गर्दै कैलालीका पर्यटकीय गन्तव्यहरूमा आन्तरिक पर्यटक बढेका छन् । कैलालीको चिसापानी, टीकापुर पार्क, विश्व रामसार सूचीमा सूचीकृत घोडाघोडी ताल, प्रसिद्ध धार्मिक स्थल गोदावरी धाम, बेहडाबाबा मन्दिर, खानीडाँडा, जाखोरताललगायत पर्यटकीय गन्तव्यहरूमा आन्तरिक पर्यटक वढेका हुन् ।
चिसापानी घुम्न अहिले दैनिक तीन–चार सय पर्यटक पुग्ने गरेका छन् । दसैँको बिदाको समयमा यहाँ पर्यटकको थामी नसक्नु भिड थियो । दुईतिर अग्ला पहाडका बीचमा बग्दै गरेको नीलो कर्णाली नदी र त्यसमाथि एउटै पिल्लरमा अडिएको पुल पर्यटकको आकर्षणका केन्द्र बनेका छन् । कर्णाली पुलमा फोटो खिच्ने, टिकटक बनाउनेको भिड लाग्ने गरेको छ । स्थानीय व्यवसायीहरूका अनुसार दसैँको बिदाका वेला दिनमा हजारभन्दा बढी पर्यटक चिसापानी पुगेका थिए । ‘पुलमा फोटो खिच्ने, टिकटक बनाउँदै रमाउनेको भिड हुन्छ’ चिसापानी बजारमा रहेको लुक होटेलका सञ्चालक शशी लिगलले भने, ‘पर्यटकको घुइँचो लागेपछि पहिलेको भन्दा व्यापार पनि निकै बढेको छ ।’
तामाङ, गुरुङ, थारूलगायत विभिन्न जातजातिका परम्परागत पोसाक र पहिरन लगाएर कर्णाली पुलमा फोटो खिच्नेको भिड देखिन्छ । पर्यटकलाई केन्द्रित गरेर स्थानीय व्यवसायीले विभिन्न जातजातिका पोसाक र पहिरन भाडामा उपलब्ध गराउने गरेका छन् । चिसापानी पुग्ने पर्यटक पुलमा रमाउनेसँगै कर्णाली नदीमा र्याफ्टिङ र बोटिङ गरेर आनन्द लिन सक्ने सुविधा छ ।
दैनिक ४०–५० जनाले नदीमा बोटिङ गर्ने गरेको कर्णाली र्याफ्टिङ एन्ड एडभेन्चर प्रालिका सञ्चालक देवराज जैसीले बताए । चिसापानी पुग्ने पर्यटकको संख्याको तुलनामा र्याफ्टिङ र बोटिङ गर्ने कम भए पनि घुम्न आउने पर्यटक भने बढेको उनको भनाइ छ । चिसापानीमा जीपलाइनको सुविधा पनि छ । चिसापानीमा कैलाली, कञ्चनपुरलगायत सुदूरपश्चिमका विभिन्न जिल्लासँगै लुम्बिनी प्रदेशका बाँके, बर्दिया तथा सीमावर्ती भारतीय क्षेत्रका पर्यटक पुग्ने गरेका छन् ।
त्यस्तै, टीकापुर पार्कमा पनि पर्यटक बढेका छन् । टीकापुर पार्कका इन्चार्ज अर्जुन कुँवरका अनुसार अरूवेलाको तुलनामा हिजोआज पार्क घुम्न आउनेको संख्या दोब्बरले बढेको छ । उनले भने, ‘अहिले कुनै दिन दुई हजार पनि पुग्छन् ।’ घुम्न आउनेहरू साथीभाइसँग वा परिवारसहित घुम्न आउने गरेको उनले बताए । टीकापुर र आसपासका गाउँबाट दसैँका वेला घर फर्केकाहरू पनि परिवारसहित टीकापुर पार्क घुम्न आउने गरेको कुँवरको भनाइ छ ।
राजा महेन्द्रका पालामा बनेको यो पार्क देशकै ठूलो पार्क पनि हो । टीकापुर पार्कमा राजा महेन्द्र बसेको आवास पनि छ । यहाँ तत्कालीन राजा वीरेन्द्र र रानी ऐश्वर्यसहित राजपरिवारका सदस्य पनि विभिन्न समयमा आएर बसेका थिए । शान्त र रमणीय वातावरण, मौसमी–बेमौसमी फूलहरू टीकापुर पार्कका आकर्षण हुन् । मुटुरोगपीडित राजा महेन्द्रले ०२४ सालमा टीकापुरमा आएर करिब डेढ महिना आराम गरेका बताइन्छ । टीकापुर पार्क यहाँको प्रमुख पर्यटकीय गन्तव्य हो ।
विश्व रामसार सूचीमा सूचीकृत घोडाघोडी ताल क्षेत्र, धार्मिक स्थल गोदावरी धामलगायत कैलालीका अन्य पर्यटकीय क्षेत्र पनि आन्तरिक पर्यटकले भरिभराउ छन् । पूर्व–पश्चिम राजमार्गसँगै जोडिएकाले घोडाघोडी ताल क्षेत्रमा पुग्न यातायातको सहज सुविधा छ ।
चाडबाडका वेला क्याम्पस तथा विद्यालयहरूमा लामो बिदा भएकाले पनि पर्यटकीय गन्तव्यहरूमा चहलपहल बढेको छ । नाटा सुदूरपश्चिमका अध्यक्ष पदमविक्रम सिंहले चाडबाडका वेला लामो बिदा हुने भएकाले खप्तडलगायत सुदूरपश्चिमका प्रमुख पर्यटकीय गन्तव्यमा पर्यटकको चहलपहल बढेको बताए । नाटाले पर्यटीय गन्तव्यका बारेमा पर्यटकलाई आवश्यक सहजीकरण गर्ने गरेको उनको भनाइ छ । ‘लामो बिदा र घुम्नका लागि उपयुक्त मौसम पनि भएकाले अहिले यहाँका पर्यटकीय गन्तव्यहरूमा पर्यटकको संख्या बढेको छ,’ उनले भने, ‘पर्यटन व्यवसायीहरूले घुमघामका लागि पर्यटकलाई विभिन्न प्याकेजहरू पनि उपलब्ध गराइरहेका छौँ ।’
