शुक्रबार साँझ आएको अविरल वर्षापछिको बाढीका कारण दक्षिण चीनको ग्वाङडोङ प्रान्तका ८० हजार मानिस विस्थापित भएका छन्।
उनीहरूलाई सुरक्षित स्थानमा सारिसकिएको बताइएको छ। टाइफुन हाइकुई र मनसुनले बिहीबारदेखि पर्ल नदी डेल्टा क्षेत्रका धेरै सहर र काउन्टीहरूमा मुसलधारे वर्षा भइरहेको छ। जसका कारण बाढी–पहिरो आई सडक अवरुद्ध भएको छ।
प्रान्तीय विपत् न्यूनीकरण आयोगले १५ सहरमा बढी जोखिम रहेको बताएको छ। सेन्जेन, झुहाई र जियाङमेन सहरहरू र फोसान, डोङगुआन र ग्वाङ्झाउका केही भागमा विद्यालयसमेत बन्द गरिएको छ।
त्यस्तै ४७ रेल सेवा अवरुद्ध भएका छन् भने ७९ सडक खण्ड, ६ वटा टोल बुथ र एउटा पुल अवरुद्ध भएको छ। सिन्ह्वा/न्युज एजेन्सी नेपाल
