नेपाल ओलम्पिक कमिटी (एनओसी)ले ओलम्पिक दिवसका अवसरमा शुक्रबार लगनखेलस्थित सैनिक शारीरिक तथा तालिम केन्द्रको हलमा विविध कार्यक्रम आयोजना गरेको थियो ।एनओसीले ओलम्पिक डेको अवसरमा विभिन्न व्यक्तित्वलाई एनओसी अवार्ड प्रदान गरेको छ ।
दोस्रो संस्करणको एनओसी अवार्डको प्रिन्टतर्फ गोरखापत्रका प्रजित शाक्य वर्षको उत्कृष्ट पत्रकार बनेका छन् । यसैगरी, भिजुअलतर्फ नेपाल टेलिभिजनका प्रज्ज्वल शाक्य उत्कृष्ट भए । एनओसीको फोटो अवार्डमा सुनीता डंगोल उत्कृष्ट भइन् । मल्टी मिडियामा शिलापत्रका सरोज तामाङ उत्कृष्ट भएका छन् ।
एनओसीले पुरुषतर्फ उत्कृष्ट एथ्लेटिक्स खेलाडीमा दीपक अधिकारीलाई अवार्ड प्रदान गरेको छ । यसैगरी, महिलातर्फ तेक्वान्दोकी सिर्जना घिसिङले अवार्ड पाएकी छिन् । उत्कृष्ट प्रशिक्षकमा तेक्वान्दोका कविराज नेगी तथा उत्कृष्ट महिला प्रशिक्षकको अवार्ड टेनिसकी रेनुदेवी कोन्डुले थापेकी छिन् ।
उत्कृष्ट संघमा नेपाल बक्सिङ संघ चुनिएको छ । यसअघि, ओलम्पिक डेमा बक्सिङ, फेन्सिङ, तेक्वान्दो, उसु, जुडो र कराँतेका खेलाडीले प्रदर्शनीमा खेल प्रस्तुत गरेका थिए ।
