मनसुनी प्रणाली भित्रिएको नौ दिनपछि देशभर फैलिएसँगै पश्चिम नेपालसम्मै वर्षा भएको छ। जल तथा मौसम विज्ञान विभागको मौसम पूर्वानुमान महाशाखाले शुक्रबार विशेष बुलेटिन जारी गर्दै ३१ जेठदेखि पूर्वी र मध्य नेपालमा केन्द्रित रहेको मनसुनी प्रणाली देशभर फैलिएको हो। हाल नेपालमा मनसुनी वायुसँगै भारतको उत्तर प्रदेशआसपासमा रहेको न्यूनचापीय प्रणालीको पनि प्रभाव छ। मनसुनीसँगै न्यूनचापीय प्रणालीको प्रभावका कारण यसपटक मध्य र पश्चिम नेपालका केही ठाउँमा ठूलो पानी पर्ने सम्भावना रहेको मौसमविद्ले आकलन गरेका छन्।
मौसमविद् राजु प्रधानांगका अनुसार आइतबारसम्म देशका धेरै स्थानमा हल्कादेखि मध्यम वर्षाको सम्भावना छ । तर, शनिबार बागमती, गण्डकी, लुम्बिनी र सुदूरपश्चिम तथा आइतबार गण्डकी, लुम्बिनी र सुदूरपश्चिमका एक–दुई स्थानमा ठूलो वर्षाको रहेको उनले बताए । ‘कुन–कुन जिल्ला वा कुन ठाउँमा ठूलो वर्षा हुन्छ भनेर आकलन गर्न सकिएको छैन,’ मौसमविद् प्रधानांगले भने, ‘प्रदेश भने छुट्याउन सकिएको छ ।’ शुक्रबार राति मधेस, बागमती, गण्डकी र सुदूरपश्चिमका थोरै तथा कोसीका एक–दुई स्थानमा ठूलो वर्षाको भएको छ ।
थोरै स्थान भन्नाले त्यहाँको कुल भूभागको १० देखि २५ प्रतिशत क्षेत्रमा वर्षा हुनुलाई बुझाउँछ । मौसम विभागले २४ घन्टमा १० मिलिमिटरभन्दा कम वर्षालाई हल्का, ११ देखि ५० मिलिमिटरभन्दा कम वर्षालाई मध्यम र ५० देखि सय मिलिमिटरसम्मको वर्षालाई भारी वर्षा भन्ने गर्छ । सयदेखि दुई सय मिलिमिटरसम्मको वर्षालाई धेरै भारी (धेरै ठूलो) वर्षा भन्ने गरिन्छ । तर, यो भूगोल र वर्षा मापन केन्द्रअनुसार फरक–फरक हुन्छ ।
महाशाखाले ठूलो वर्षाका कारण डुबान, बाढी, पहिरोको चेतावनी पनि दिएको छ । नेपालमा ३१ जेठमा मनसुन भित्रिएसँगै असार १ र २ गते पूर्वी पहाडी क्षेत्रमा ठूलो वर्षा हुँदा बाढीपहिरोले जनधनको क्षति भएको छ । शुक्रबार देशभरका धेरैजसो क्षेत्रमा वर्षा भएको छ । २४ घन्टा (शुक्रबार रातिसम्म) झापाको केचनामा १९१ र रुपन्देहीको लुम्बिनी क्षेत्रमा रहेको मापन केन्द्रमा १४१ मिलिमिटर वर्षा मापन भएको छ । त्यसबाहेक धेरै वर्षा रेकर्ड हुनेमा सिन्धुलीको कुस्माटारमा १३५, चितवनको ठोरीमा ११७.२, नवलपुरको देउरालीमा १०५.६, पाल्पाको बल्ड्याङगढीमा १०३.२ र चितवनको रामपुरमा १००.६ मिलिमिटर रहेको छ ।
