विज्ञका अनुसार हेडसेट अत्यधिक महँगो भएकाले यसले आमउपभोक्तालाई धेरै आकर्षित गर्नेछैन
एप्पलले बहुप्रतीक्षित अग्मेन्टेड रियालिटी हेडसेट ‘भिजन प्रो’ लन्च गरेको छ । एप्पल कम्पनीका प्रमुख कार्यकारी अधिकृत (सिइओ) टिम कुकका अनुसार नयाँ हेडसेट भर्चुअल र वास्तविक संसारलाई सजिलैसँग मिलाउन सक्छ ।
टेक्नोलोजीको शीर्ष कम्पनी एप्पलले आइफोनका लागि नयाँ अपरेटिङ सिस्टम र म्याकबुक एयर ल्यापटपका लागि अपडेट पनि ल्याएको छ । सार्वजनिक भएको हेडसेट एकपटक चार्ज भएपछि दुई घन्टा चल्नेछ । यसको मूल्य ३४९९ डलर रहेको छ । उपभोक्ताका लागि आगामी वर्ष अमेरिकी बजारमा उपलब्ध हुने बताइएको छ ।
एप्पल हेडसेटको मूल्य बजारमा पाइने आमहेडसेटभन्दा कैयौँ गुणा महँगो हो । गत हप्ता मेटाले पनि क्वेस्ट हेडसेट लन्च गरेको थियो, जसको मूल्य ४९९ डलर थियो । यद्यपि, एप्पलले आर्टिफिसियल इन्टेलिजेन्सबारे धेरै केही बोलेको छैन । अहिले यो नयाँ प्रविधिको हेडसेट सिलिकन भ्यालीमा चर्चाको विषय बनेको छ ।
एप्पलको भिजन प्रो अन्य हेडसेटभन्दा बिल्कुलै फरक खालको हेडसेट हो । हेर्दा भर्चुअल रियालिटी हेडसेटको तुलनामा स्किइंगका गगल्सजस्तो देखिन्छ । कम्पनीले यो नयाँ डिभाइसमा ‘अग्मेन्टेड रियालिटी’ टर्म प्रयोग गरेको बताएको छ । अग्मेन्टेड रियालिटी (संवद्र्धित वास्तविकता)ले हाम्रो वरिपरि भर्चुअल जिचबिज राखिदिन्छ र एउटा स्क्रिनमार्फत मिल्दोजुल्दो वास्तविकता देखिन्छ । त्यसमा वास्तविक चिजका साथै भर्चुअल चिज पनि हुने कम्पनीको भनाइ छ ।
प्रयोगकर्ताले भर्चुअल दुनियाँमा फिल्म हेर्न, एप प्रयोग गर्न वा दस्तावेज लेख्न पनि सक्छ । तर, अहिलेसम्म यस्तो खालको प्रविधिका लागि पर्याप्त बजारको सुनिश्चितता छैन । यस्तो अवस्थामा नयाँ हेडसेटले प्रयोगकर्तालाई कत्तिको आकर्षित गर्छ, त्यो हेर्न बाँकी नै छ ।
विशेषज्ञका अनुसार हेडसेटले आमउपभोक्तालाई त्यति धेरै आकर्षित गर्नेछैन । कारण, यो अत्यधिक महँगो छ । अर्को कुरा, यो फस्र्ट जेनेरेसन डिभाइस भएकाले यसमा केही कमी पनि हुन सक्छन् । म्याकरुमर्जका सिनियर एडिटर हार्टले साल्र्टसनको भनाइमा एप्पलले आफ्ना डिभाइसमाथि गरिने हरेक शंकालाई गलत साबित गर्दै आएको छ । उसको इतिहास आममानिसलाई आफ्ना उत्पादनमा आकर्षित गरेको पाइन्छ । विगतको प्रदर्शन हेरेर पनि उपभोक्ताले हेडसेटमा पैसा लगाउन हिचकिचाउँदैनन् ।
भिजन प्रो डिभाइसबारे सिइओ कुकले हेडसेटले प्रयोगकर्तालाई वास्तविक संसारझैँ गरी डिजिटल कन्टेन्ट हेर्ने, सुन्ने र संवाद गर्ने अवसर दिन्छ । साथै, डिभाइसलाई हात, आँखा र आवाजमार्फत नियन्त्रण गर्न सकिन्छ । यस्तै, औँलाले छुँदा या हल्लिँदा कन्टेन्ट स्क्रोल गर्न सकिन्छ ।
मेटा र लेनेभोले भर्चुअल रियालिटी हेडसेटको नयाँ स्वरूप जारी गरेको हप्तादिनपछि एप्पलले यस्तो घोषणा गरेको हो । मेटा र लेनेभोका हेडसेटले वास्वतिक संसारको दृश्यमा कुनै भर्चुअल अब्जेक्ट मिश्रण गर्दैनन् । मेटाले पनि मिश्रित वास्तविकताको क्षेत्रमा लगानी गरेको छ । तर, यतिवेला यो सेक्टरले संघर्ष गरिरहेको छ ।
शोधकर्ता थोमस ह्युसनका अनुसार नयाँ डिभाइसले आफ्नो बजार खोज्न केही समय लाग्छ । ह्युसन भन्छन्, ‘यदि १०–१५ वर्षअगाडि उपभोक्ताले फोनमा करिब दुई हजार डलर खर्च गर्न सक्छन् भनेको भए सायदै खर्च गर्थे होलान् । तर, अब स्थिति अर्कै भएको छ । उपभोक्ता गुणस्तरीय चिज चिन्न सक्षम भएका छन् ।’
आइएसओ–१७ : भिजन प्रोको घोषणासँगसँगै एप्पलले नयाँ अपरेटिङ सिस्टम आइओएस–१७ पनि जारी गरेको छ । यो आइफोन पछिल्लो अपरेटिङ सिस्टम भएको बताइएको छ । यसको अपडेटमा कन्टेक्टर पोस्टर पनि छ । यसमार्फत प्रयोगकर्ताले कसैलाई फोन गर्दा दोस्रो व्यक्तिको स्क्रिनमा फोन गर्ने व्यक्तिको अनुहार देखिन्छ । यसबाहेक लाइभ भ्वाइसमेल पनि उपलब्ध छ । जसअन्तर्गत म्यासेज रियल टाइममा ट्रान्सक्रिप्ट पनि हुनेछ । एप्पल मेसेजअन्तर्गत पठाइने अडियो मेसेजमा यो सुविधा उपलब्ध हुने कम्पनीको भनाइ छ ।
यसैगरी, एप्पलले चेक–इन नामक नयाँ सिस्टम पनि ल्याउने तयारी गरेको छ । यो सिस्टममार्फत आफू कुनै ठाउँ पुग्दा आफ्ना साथीभाइ तथा परिवारलाई सम्बन्धित ठाउँमा पुगेको सन्देश पुग्नेछ ।
