पूर्वीनाकामा कोरोनाविरुद्ध उच्च सतर्कता

आइतबार, २६ चैत, २०७९
डिजिटल संस्करण

पूर्वीनाका काँकडभिट्टाबाट कोभिड– १९ का संक्रमित भित्रिन नदिन उच्च सतर्कता अपनाउन थालिएको छ। भारतलगायत तेस्रो मुलुकबाट प्रवेश गर्ने विदेशी नागरिकको स्वास्थ्य परीक्षण अनिवार्य गरिएको छ। 

भारतीय भूमिमा एक साताभन्दा बढी समय बसेर नेपाल फर्किने खोप कार्ड नभएका नेपाली नागरिकको समेत नाकामा स्वाब परीक्षण अनिवार्य गरिएको यहाँस्थित हेल्थ डेस्ककी ल्याब असिस्टेन्ट रक्षा देउजाले बताइन्। 

उनका अनुसार हेल्थ डेस्कले विगतदेखि नियमित निगरानी गर्दै आएको भए पनि भारत र नेपालमा कोभिड– १९ को नयाँ भेरियन्टका संक्रमितको संख्या ह्वात्तै बढ्न थालेपछि नाकामा सतर्कता उच्च बनाइएको हो। 

नेपाल प्रवेश गर्ने विदेशी नागरिकको स्वाब परीक्षण र सबै आगन्तुकको सोधपुछ अनिवार्य गरिएको उनले जानकारी दिइन्। चैत महिनामा यो नाकामा गरिएको स्वाब परीक्षणबाट कसैलाई पनि कोभिड– १९ को संक्रमण देखिएको छैन। दुई वर्षअघि स्थापना गरिएको हेल्थ डेस्कमा सातजना कर्मचारी कार्यरत छन्। दैनिक सयभन्दा बढीको स्वाब परीक्षण भइरहेको उनले जानकारी दिइन्। 

दुई महिनाभन्दा बढी भारतमा काम गरेर फर्किएका नेपाली, नेपालका उद्योगमा काम गर्न आउने भारतीय नागरिक र तेस्रो मुलुकबाट नेपाल प्रवेश गर्ने पर्यटकलाई प्राथमिकतामा राखेर दैनिक स्वाब जाँच गरिरहेको उनले बताइन् । भारतमा कोभिड संक्रमण बढेसँगै यहाँ पनि जाँचलाई तीव्र बनाइएको छ। नाकामा कोभिड परीक्षणको चाप बढ्दै गएकाले कर्मचारी अभाव हुने देखिएको छ।

सीमामा स्वास्थ्य जाँचका लागि कोसी प्रदेशको स्वास्थ्य मन्त्रालयबाट एकजना, मेचीनगर नगरपालिकाबाट चार र स्वास्थ्य कार्यालयबाट दुईजना गरी हाल सात कर्मचारीले सेवा दिइरहेका छन्। हेल्थ डेस्ककी असिस्टेन्ट देउजाले नगरपालिकालाई थप तीन कर्मचारी पठाइदिन माग गरिएको बताइन्। 

सुझावित समाचार