चीनमा जनसंख्याको चिन्ता उच्च बिन्दुमा पुगेकाले सरकारका राजनीतिक सल्लाहकारले जन्मदर बढाउन केही योजना सिफारिस गरेका छन् । धेरै कलेज राष्ट्रिय सरोकारलाई समर्थन गर्न अद्वितीय योजनासमेत लिएर आउँदै छन् । चीनका नौवटा कलेजले अप्रिलमा विद्यार्थीलाई ‘प्रेम गर्न’ एक साताको छुट्टी दिइरहेका छन् ।
एनबिसी न्युजका अनुसार फ्यान मेई एजुकेसन ग्रुपद्वारा सञ्चालित नौ कलेजमध्येको एक मियाँयाङ फ्लाइङ भोकेसनल कलेजले पहिलोपटक मार्च २१ मा वसन्त विश्रामको घोषणा गरेको छ, जसमा रोमान्समा विशेष ध्यान केन्द्रित छ । ‘म आशा गर्छु कि विद्यार्थीहरू हरियो पानी र पहाड हेर्न जान्छन् र वसन्तको अनुभूति गर्न सक्छन् । यसले विद्यार्थीको क्षितिज फराकिलो र उनीहरूको भावनालाई प्रवद्र्धन गर्ने मात्र होइन, कक्षाकोठामा शिक्षण सामग्रीलाई समृद्ध र विस्तार गर्नेछ,’ मियाँयाङ फ्लाइङ भोकेसनल कलेजका उपडिनले एक विज्ञप्तिमा भनेका छन् ।
विद्यार्थीको गृहकार्यमा डायरी लेख्ने, व्यक्तिगत विकासको ट्र्याक राख्ने र यात्रा भिडियोहरू बनाउने समावेश छ । यो प्रयास जन्मदर बढाउने उद्देश्यले गरिएको हो । सरकारले जन्मदर बढाउन २० भन्दा बढी सिफारिस ल्याएको छ । तर, विज्ञहरूका अनुसार उनीहरूले गर्न सक्ने सबैभन्दा राम्रो भनेको जनसंख्याको गिरावटलाई सुस्त बनाउनु हो ।
सन् १९८० र २०१५ को बीचमा लागू गरिएको एक सन्तान नीतिले चीनमा ठूलो जनसांख्यिकीय खाडल खडा गर्यो । अधिकारीहरूले सन् २०२१ मा सन्तानको सीमा तीन पुर्याए । तर, घरमा बस्ने कोभिडको समयमा पनि दम्पतीहरू बच्चा जन्माउन अनिच्छुक छन् ।
सन्तान जन्माउनका लागि युवाहरूले उच्च बाल हेरचाह र शिक्षा लागत, कम आम्दानी, कमजोर सामाजिक सुरक्षा र लैंगिक असमानतालाई निरुत्साहित कारकका रूपमा उद्धृत गर्छन् । अघिल्लो महिनामा चीनको जनराजनीतिक परामर्शदात्री सम्मेलन (सिपिपिसिसी) को वार्षिक बैठकमा पेस गरिएका प्रस्तावमा जन्मदर बढाउने, दोस्रो र तेस्रो मात्र नभई आफ्नो पहिलो बच्चा हुर्काउने परिवारलाई दिइने अनुदानदेखि लिएर निःशुल्क सार्वजनिक शिक्षाको विस्तार तथा सुधार र प्रजनन उपचारमा पहुँच समावेश छन् ।
