अघिल्लोपटकको माग सुनवाइ नभएको जनाउँदै असन्तुष्ट पदाधिकारीले शनिबार एन्फा अध्यक्ष नेम्वाङले डाकेको आकस्मिक बैठकमा सहभागिता जनाएनन्
अखिल नेपाल फुटबल संघ (एन्फा)को शनिबार बसेको कार्यसमितिको आकस्मिक बैठक विवादित बनेको छ । एन्फा अध्यक्ष पंकज नेम्वाङले डाकेको बैठकलाई असन्तुष्ट समूहका १० सदस्यले बहिष्कार गरेसँगै विवादित बनेको हो । बहिष्कार गरेका सदस्यहरूले महासचिव किरण राई र कोषाध्यक्ष रवीन्द्र जोशीको नियुक्ति विधानविपरीत नभएको र आर्थिक पारदर्शिता हुन नसकेको आरोप लगाउँदै आएका छन् । यसै मुद्दा सुनवाइ नभएको जनाउँदै उनीहरूले १७ फागुनमा भएकोे बैठक बहिष्कार गरेका थिए । यद्यपि, संस्थापक पक्षले बहुमत पुगेको भन्दै विभिन्न पदपूर्ति र नियुक्ति गरेको थियो ।
एन्फा अध्यक्ष नेम्वाङले अघिल्लो बैठकलाई वैधानिकता दिनका लागि नै विनाएजेन्डा बैठक बोलाएका हुन् । अध्यक्ष नेम्वाङले यसपटक पनि विधिअनुसार बैठक नबोलाएको भनी ती सदस्यहरूले बहिष्कार गरेका हुन् । ‘यसअघिको बैठकलाई वैधानिक बनाउन उहाँहरूले कार्यसमितिको आकस्मिक बैठक बोलाउनुभयो । हामीले एजेन्डा माग्दा दिनुभएन,’ उपाध्यक्ष दीर्घबहादुर केसीले नयाँ पत्रिकासँग भने ।
बैठकले गर्यो चार निर्णय
कार्यसमितिको आकस्मिक बैठकले विभिन्न चार निर्णय गरेको छ । बैठकले प्रधानमन्त्री थ्री नेसन्स कप विजेता नेपाली टोलीलाई नगद पुरस्कारका लागि सरकारसँग माग गर्ने, फिफासँग विभिन्न शीर्षकमा बजेट माग गर्ने, जसबाट आएको रकमले ए, बी र सी डिभिजन लिगमा आवश्यक खर्च गर्ने निर्णय गरेको छ । थ्री नेसन्सको पुरस्कार र खेलाडीको बसोवास खर्च राखेपसँग माग गर्ने, फिफाको सहयोगमा निर्माण गर्ने पूर्वाधारको सम्भावना र जग्गाप्राप्ति, मैदान निर्माणमा जिल्ला र क्लबसँग प्रस्ताव माग गर्ने निर्णय गरेको छ । ‘राखेपसँग बजेट माग्न आकस्मिक बैठक बस्नुपर्ने कारण के रहेछ ? यसरी राखेपसँग खर्च मागेर बैठकको नाममा यति ठूलो पैसा खर्च गर्नु कस्तो कार्य हो ?’ एक सदस्यले भने ।
