आइसिसी पुरुष विश्वकप लिग– २ अन्तर्गत अन्तिम त्रिकोणात्मक सिरिजको तेस्रो खेलमा नेपालले पपुवा न्युगिनीको सामना गरिरहेको छ ।
कीर्तिपुरस्थित त्रिवि खेलमैदानमा नेपालले टस जितेर फिल्डिङ रोजेपछि ब्याटिङ गरिरहेको पिएनजीले कमजोर सुरुवात गरेको छ ।
सात ओभरमा १७ रनको अवस्थामा पिएनजीले दुई विकेट गुमाइसकेको छ । नेपालका लागि सोमपाल कामीले दोस्रो विकेट लिए । उनले २२ बलमा १४ रन बनाएका हिरी हिरीलाई करण केसीको हातबाट क्याचआउट गराए ।
त्यसअघि युएईविरुद्ध हिजोको म्याचका हिरो ललितनारायण राजवंशीले नेपाललाई ब्रेक थ्रु दिलाएका थिए । ओपनिङ बलिङमा आएका ललितले ३.५ ओभरमा पिएनजीका किप्लिन डोरिगालाई बोल्डआउट गरे । त्यसवेला पिएनजी पाँच रनको अवस्थामा थियो । डोरिगाले १६ बलमा दुई रन बनाए ।
आगामी चार वर्षका लागि एकदिवसीय मान्यता जोगाउन सफल भएको नेपाल आजको खेलमा अर्को महत्वपूर्ण लक्ष्यसहित उत्रिएको छ । आज र बाँकी अन्तिम खेल जितेर आगामी वर्ष हुने एकदिवसीय विश्वकप क्रिकेटको छनोट प्रतियोगितामा सीधै छानिने लक्ष्य नेपालको रहेको छ ।
