आइसिसी पुरुष विश्वकप लिग–२ सिरिज क्रिकेट प्रतियोगितामा नेपालको विजय यात्रा रोकिएको छ । लगातार पाँच खेल जित निकालेको नेपालको अर्को स्पष्ट दुई अंक जोड्ने सपना युएईले तोडेको छ । दुबईमा भएको खेलमा युएईले नेपाललाई ६८ रनको फराकिलो अन्तरले हरायो । हारसँगै शीर्ष तीन र पाँचको दाबी गरिरहेको नेपालको यात्रामा धक्का लागेको छ । युएई र नेपालले समान ३० खेल खेलेका छन् । युएईले नेपालमाथि महत्वपूर्ण जित निकाली दुई अंक बटुल्यो ।
युएई ३१ अंकका साथ पाँचौँ स्थानमा छ । नेपाल ३१ अंकका साथ छैटौँ स्थानमा छ । युएईले पाँचौँ स्थानमा रहेको नेपाललाई तीन अंकले पछि पारेको छ । नेपालले १३ जित र १५ हारको सामना गरेको छ । युएईले १४ जित र १३ हार व्यहोरेको छ । विश्वकप लिग–२ को शीर्ष तीनमा रहने राष्ट्रहरू सीधै विश्वकप छनोट खेल्नेछन् । पाँचौँ स्थानमा रहने टोलीको एकदिवसीय मान्यता जोगिनेछ । छैटौँ र सातौँ स्थानमा रहने राष्ट्रहरूले एकदिवसीय मान्यता गुमाउनेछ ।
नेपाल एक सय ३९ रनमै समेटियो
पहिलो ब्याटिङ गरेको युएईले निर्धारित ५० ओभरमा आठ विकेट गुमाउँदै दुई सय सात रनको मध्यम योगफल बनाएको थियो । नेपालले युएईलाई मध्यम योगफलमा रोक्दा लगातार छैटौँ जित निकाल्ने सम्भावना बढेको थियो । तर, म्यान अफ दी म्याच रोहन मुस्तफा र मेयाप्पनले घातक बलिङ गरेपछि नेपाली ब्याट्सम्यान ३१.५ ओभरभन्दा बढी टिकेनन् ।
नेपालले सबै विकेट गुमाउँदा स्कोर बोर्डमा केवल एक सय ३९ रन मात्र बनाएको थियो । रोहनले १० ओभरमा दुई मेडन राखी तीन विकेट लिए । उनले आफ्नो इनिङ्समा दुई मेडन ओभर गरेका थिए । यसैगरी, मियाप्पनले ८.५ ओभरमा २६ रन खर्चेर नेपालका महत्वपूर्ण विकेट हात पारे । उनले एक मेडन ओभर फ्याँके ।
कुशल मात्र टिके
नेपालको कमजोर ब्याटिङमा मध्यक्रममा कुशल मल्ल मात्र टिके । उनले नेपालका लागि सर्वाधिक ६० रनको योगदान दिए । आक्रामक ब्याटिङ गरेका कुशलले ५३ बलमा नौ चौका र एक छक्का प्रहार गरेका थिए । नेपालका ओपनरद्वय कुशल भुर्तेल र आसिफ शेखले पहिलो विकेटका लागि १.२ ओभरमा १२ रन जोडेका थिए ।
यसपटक युएईसँगको प्रतिस्पर्धामा नेपालका कुशलबाहेक अन्य ब्याट्सम्यान लामो समय क्रिजमै बसेनन् । नेपालका पूर्वकप्तान ज्ञानेन्द्र मल्ल, कप्तान रोहितकुमार पौडेल तथा आरिफ शेख डकआउट भए । शेखले १० बल, मल्लले ६ बल तथा पौडेलले दुई बलको सामना गरेका थिए । कुशल आउट हुँदा नेपाल १८.१ ओभरमा ९३–६ को स्थितिमा थियो । नेपालको इनिङ्समा अर्का पूर्वकप्तान सन्दीप लामिछानेले २४ बलमा चार चौकाको सहयोगमा २६ रन बटुले । सन्दीपले आफ्नो उत्कृष्ट फर्मलाई जारी राखेका छन् । उनले १० ओभर बलिङ गर्दै सर्वाधिक तीन विकेट लिए ।
