कैलाश गाउँपालिकाका नागरिकले गाउँमै आँखाको उपचार पाउने

मकवानपुरको विकट क्षेत्र कैलाश गाउँपालिकाका स्थानीयले चैतको अन्तिम सातादेखि आफ्नै पालिकामा आँखाको उपचार सुविधा पाउने भएका छन्।

गाउँपालिका र तिलगंगा आँखा प्रतिष्ठानबीच पालिकामा सामुदायिक आँखा केन्द्र सञ्चालन गर्ने सहमति भएपछि विकट ठाउँका स्थानीयले पालिकामै आँखा उपचारको सुविधा पाउने भएका हुन्। पालिका र प्रतिष्ठानबीच उपचार केन्द्र सञ्चालन गर्ने सहमति-पत्रमा हस्ताक्षर भएको छ।

तिलगंगा आँखा प्रतिष्ठान हेटौँडा सामुदायिक आँखा अस्पतालका व्यवस्थापक सुधीर श्रेष्ठ र कैलाश गाउँपालिकाका अध्यक्ष लोकबहादुर मोक्तानले सम्झौता-पत्रमा हस्ताक्षर गरेका हुन्। सहमतिअनुसार आउँदो चैतको अन्तिम सातादेखि सामुदायिक आँखा केन्द्र सञ्चालनमा आउनेछ।

सहमति-पत्रमा हस्ताक्षरपछि बोल्दै पालिकाका अध्यक्ष लोकबहादुर मोक्तानले सामान्यभन्दा सामान्य रोगको उपचारका लागि सदरमुकाम धाउनुपर्ने बाध्यता भएका स्थानीयले पालिकामै आँखा उपचार गराउने व्यवस्था गर्न पाउँदा खुसी लागेको बताए।

उनले वडा नम्बर ३ कालिकाटारस्थित पालिकाको भवनसँगै निर्माणाधीन अस्पतालको काम सकिएपछि आँखा केन्द्रको सुविधासमेत सोही अस्पतालबाट दिने व्यवस्था गरिने बताए। आँखा केन्द्रमा एक नेत्र सहायकसहित ३ कर्मचारी रहनेछन्।