वार्षिक लाखौँ तीर्थयात्री आवतजावत हुने ताप्लेजुङको पाथीभरा सडकको सुकेटारदेखि काफ्ले पाटीसम्मको कालोपत्रे गर्ने कामको ठेक्का लागेको एक वर्ष बितिसकेको छ । ठेक्का लागेको एक वर्षसम्म पनि कामको प्रगति आशाजनक छैन ।
दुई वर्ष ६ महिनामा सक्ने गरी काठमाडौंको कन्टेक प्रा.लि.ले कालोपत्रे गर्ने कामको ठेक्का लिएको थियो । कन्टेकसँग ०७८ पुस ११ गते सुकेटारदेखि काफ्ले पाटीसम्मको १० किलोमिटर कालोपत्रे गर्ने ठेक्का सम्झौता भएको थियो । ९५ करोडको ठेक्का खुलेकोमा कन्टेकले ४१ करोड ७६ लाख ४७ हजार अर्थात् ४६ प्रतिशत घटीमा ठेक्का पारेको हो ।
०८१ सालको जेठ मसान्तसम्ममा काम सक्नुपर्ने सम्झौतामा उल्लेख छ । सोअनुसार हालसम्म करिब ४० प्रतिशत काम सकिसक्नुपर्ने भए पनि आठ प्रतिशत पनि नभएको ताप्लेजुङ उत्तर दक्षिण ओलाङचुङगाेला सडकका प्रमुख अमिन्द्र खड्काले बताए ।
सोही ठेकेदार कम्पनीले ठेक्का पारेको सुकेपोखरी–छातेढुंगा–ह्वाकु–चोकपुर–हाङपाङ–ढुंगेसाँघु सडकको निगुरादिन–हाङपाङ खण्डमा पनि काम शून्य छ । यहाँ पनि ०७८ पुस ११ गते नै कन्टेक प्रा.लि.सँग कालोपत्रे गर्न ठेका सम्झाैता भएको थियो । दुई लेनको बाटो कालोपत्रेका लागि ८० करोडको ठेक्का खुलेकोमा सो कम्पनीले ३६ करोड ६४ लाख ७१ हजारमा ठेक्का पारेको थियो ।
कामका लागि जति ताकेता गरे पनि ठेकेदार कम्पनीले अटेर गरेर काममा ध्यान नदिएको सडक प्रमुख खड्काले बताए । अब ती दुईवटै सडकको काम समयमै सकिने सम्भावना ज्यादै न्यून रहेको उनको भनाइ छ ।
